Royal Greenlandip sulisorisami isertitakinnerusut meeraasa Danmarkimi ukiumi atuarfiusussami 2017-18-imi efterskolernikkut piginnaasatigut siuariaateqarnissaannut tapersersorumallugit Royal Greenland tapiinissaminut neqerooruteqaqqippoq.

Kalaallit Nunaanni inuusuttunut ilinniarfiusartuni sulisut oqaatigaat, inuusuttut Danmarkimi efterskolersimasut inuusuttunut ilinniakkamik ingerlatsigaangata ilinniartoqatiminnit efterskolersimanngitsunit ingerlalluarnerusartut.

Royal Greenlandip suliniummik aallartitsinermini kissaatigaa, sulisorisami isertitakinnerusut meeraasa piginnaasatigut siuariaateqarnissaannut, kulturimik allamik misigisaqarnissaannut aamma Danmarkimi efterskolernerminni puigunaatsumik misigisaqarnissaannut tamatumanilu inuusuttut ilinniarnermi inersimasunngornermilu unammillernartunik aqqusaagaqartarnermik nassataqarfiusartumi inuttut piareersimanerunissaannut periarfississallugit.

Royal Greenlandip ilaatigut Royal Greenland Academy aamma Internationale Management Traineetut ilinniagaq aqqutigalugit sulisumi piginnaasatigut siuariaateqarnissaannut ataavartumik tapersersuisarpoq, efterskolertitsisarnermullu suliniummik ingerlatsinitta ilutigisaanik Royal Greenlandimi ilinniarluarsimasunik siunissami sulisoqarlernissatsinnut periarfissaqarnissarput naatsorsuutigaarput.

Meeqqat sisamat ukiumi atuarfiusumi 2017-18-imi efterskoleriartortissinnaanissaat neriuutigaarput, taamaattumik aappaagu 9. imaluunniit 10. klassertussamik efterskoleriarusuttumillu meeraqaruit matumani atuakkat nangiinnaruk.

Kikkut qinnuteqarsinnaappat?

Royal Greenlandimit taperneqarnissamut qinnuteqarniaraanni piumasaqaatit makku eqquutitinneqassapput:

• Angajoqqaajusuni ikinnerpaamik ataaseq Royal Greenlandimi sivikinnerpaamik ukioq ataaseq sulisimasuussaaq aamma suliatigut aalajaatsuullunilu pimoorussisuussaaq

  • Ilaqutariiusut ukiumut annerpaamik 340.000 kr.-nik isertitaqassapput
  • Efterskolernissap aallartinnissaa sioqqullugu meeraasoq angajoqqaallu sivikinnerpaamik ukioq ataaseq Kalaallit Nunaanni aalajangersimasumik najugaqarsimasuussapput
  • Meeraq pinngitsoorani ukiuni arfineq-pingasuni atuartuusimassaaq imaluunniit 14-inik ukioqalereersimassaaq 18-ileereersimassananilu
  • Meeraq Danmarkimi ilaqutariinnik attaveqarfigisartagaqassaaq
  • Atuarfik meeraq pillugu oqaaseqaasiorsimassaaq

Royal Greenland qanoq ilinikkut tapiisarpa?

Taperneqarnissamut angajoqqaatut Namminersorlutik Oqartussanut nammineq qinnuteqassaasi, qinnuteqarnersilu Namminersorlutik Oqartussanit akuerineqareerpat Royal Greenland akissarsiavit tapernerisigut imaluunniit qitornassi efterskolerneranut angajoqqaatut akiligassassi sinneruttut akilernerisigut tapiissaaq.

Qitornassi efterskolerneranut atatillugu angajoqqaatut nammineq akiligassassi matussusernissaannut Royal Greenlandip tapiinermi saniatigut meeqqap soorlu kaasarfimmiussaanik aamma efterskolerneranut atatillugu aningaasartuutinut allanut immaqalu angerlarluni juullisioriarluni angalanissaanut aningaasartuutissanik tapiissaaq. .

Atuarfimmik toqqaaneq

Sulisutta meeraasa efterskolerfissaat suliatigut, inuttut piginnaasanik ineriartortitsinikkut minnerunngitsumillu inuusuttuaqqanik nunartik qimallugu nunamut ungasissumut allamillu kulturilimmut aallarsimasunik tapersersuinikkut pitsaasuunissaa Royal Greenlandip pingaartittupilussuaa.

Suliniutip aallartinneraniit Hjørringimi Halvorsminde Efterskole suleqataasimammat piumasaqaativullu naapertorlugit atuarfik pitsaasuullunilu piginnaasalinnik sulisoqarmat Royal Greenlandip meeqqat sisamat efterskoleriartussat tapiiffigisassatut toqqakkani Halvorsminde Efterskolemi atuassasut aalajangersimavaa.

Halvorsminde Efterskole pillugu annerusumik atuarsinnaavutit, nittartakkami uani: www.halvorsminde.dk.

Efterskolet allat atuarfiusinnaanissaannut kingusinnerusukkut periarfissaqartitsilerumaarpugut.

Ilaqutariinnik attaveqarfigisartagaqarneq

Meeqqap ilaqutariit attaveqarfigisartagai pitsaasuunissaat pingaaruteqarpoq, sulisullu ilaqutariinnik attaveqarfigisartagassanik nassaarnissani nammineq akisussaaffigissavaa. Ilaqutariinnik attaveqarfigisartagassanik nammineq nassaarsinnaanngikkaanni Royal Greenland Aalborgimi Kalaallit Illuannut ikiuussinnaasumut attaveqassaaq.

Meeqqap Danmarkimiinnerani ilaqutariit attaveqarfiusartut meeqqamut tunngaviusumik tapersersortaassapput. Tassa imaappoq, meeraq efterskolemit feeriaraangat weekendinilu atuanngiffeqaraangat napparsimagaangallu ilaqutariit attaveqarfigisartakkani najortassavai.

Taamaattumik meeqqassi efterskolernermi nalaani ilaqutariinnik attaveqarfigisartagassaanik ilerasuuteqarasi meeqqassi paarinissaanut akisussaaffimmik tunniussivigisinnaasassinnik nassaaritsi.

Qinnuteqaatip nassiunnerani meeqqap ilaqutariit attaveqarfigisartagassaasa immersugaat atsiornertalik ilanngunneqassaaq.

Atuarfimmik, meeqqamik ilaqutariinnillu attaveqarfigisartagassanik suleqateqarneq

Royal Greenland atuarfimmik, meeqqamik aammalu ilaqutariinnik attaveqarfigisartakkanik ataavartumik oqaloqateqartassaaq, tamatumani meeqqap atugai, piumassuseqarnera atuarnerata ingerlarnga ilaatigut oqaloqatigiissutigineqartassapput.

Qinnuteqarneq

Qitornat Danmarkimi efterskolerusuppat ilaqutariittullu piumasaqaataasunik naapertuigussi taperneqarnissamut qinnuteqarnermut immersugassaq uani immersoriarlugu ilanngussat ilanngullugit kingusinnerpaamik 2016-imi decembarip 14-iani nassiuguk mailimut uunga: sold@royalgreenland.com

Taperneqarnissamut qinnuteqarnermi immersugassap efterskolernermut Namminersorlutik Oqartussanit tapiiffigineqarnissamut qinnuteqarnermi immersugassaq assigaa.

Qulaani allassimasut pillugit apeqqutissaqaruit Søren Olsen Damgaard sianerfigalugu allaffigaluguluunniit attaveqarfigiuk normumut uunga: +299 54 75 87 imaluunniit mailimut uunga: sold@royalgreenland.com

Toqqaaneq

Meeqqat sisamat 2017-18-imi efterskoleriartortinnissaat aalajangersimavarput. Piumasaqaatinik naapertuilluni sisamanit amerlanerusunik qinnuteqartoqarsimappat makitsisoqarumaarpoq.

Namminersorlutik Oqartussanut kingusinnerpaamik 1. februaari 2017-imi qinnuteqartoqarsinnaanera pissutigalugu qinnuteqartut tamarmik kingusinnerpaamik 15. januaari 2017-imi nalunaarfigineqassapput.

Royal Greenland Kalaallit Nunaanni immikkut ittumik akisussaaffeqarpoq, ammasumillu attaveqatigiinnikkut eqeersimaartumillu suleqataanikkut inuiaqatigiinni pissutsitigut unammillernartunik toraagaqarnermi aaqqiissuteqarniarluta suleqataalluarnissarput kissaatigaarput, annermillu piginnaasanik ineriartortitsineq inuiaqatigiinnut pingaaruteqarluinnartuusoralutigu.

 
 

Royal Greenland aperiguk

i
Write the text from the image