10. oktobari 2012

Aasaanerani arpaqattaartarnerit naggataarnialerpagut. Uanga aasaanerani unamminerit kingullersaanni arpaqataaqqammerpunga. Maannakkut sisorarnermik sungiusarnissaq sammilerpara decembarimi unamminissat siulliit tikinnissaannut.

Sungiusarnera ingerlattarpara sisoraatit assakaasullit atorlugit sapaatip akunnerani ullut tamakkerlugit aamma sapaatip akunnerata naanerani qaqqami. Sapaatip akunnerata naanerani pisulluni piniariarneq samminerusarpara. Piffissami matumani tuttut piniarnerusarlugit. Sapaatip akunnerata naanerani marlunnik tuttuppunga. Uannut pingaartuuvoq pisulluni piniariartarnerni sivisuumik sakkortuumillu pisuttarnissaq. Nuannarisarpara sivisuumik pisoreeraangama tuttunik pisaqartarneq utimullu assinganik ungasitsisigumut nammattarneq. Taamatut sungiusarluartarpunga.

Uani sapaatip akunnerani nukatuaq immap killinganiittoq sanioqqutiinnarlugu qaqqamut majuarlunga angisoorsiorpunga. Akunnerni arfineq-pingasuni pisuppunga tuttullu angisuut marluk pisaralugit. Qaqqatigut pisuttarneq pitsammik nukittorsaatiginartarpoq uumasunillu namminnerup uppatinut, qitimut naanullu nukittornartuuvoq.

Taamatut pisuttarninni eqqaasittarpaannga qanga ujakkaarlutik sisorallammannik, Thomas Wassberg 80-ikkunni ajugaajuartartuusoq. Wassberg ilisimaneqarpoq svenskiusutut umissualittut, angussuaq taanna nukittoorsuuvoq.

Wassberg sungiusaraangami imminut qajassuunneq ajorpoq. Sverigemi orpippassuarni sakkortuumik ungasissumut arpattarpoq kiisalu qangatut nukkassartarluni; orpippassuarni assaasarpoq orpiup sorlai piiarlugit akunnerni arlalinni, allamik pissuteqartanngilaq taamaallaat sungiusarnermik. Takorloorsinnaavara taamatut sungiusartarnermini sungiusartarfinni angusarineqartartup assinganik pissarsisassasoq. Ulluinnarni sungiusariaaseq imminut tulluartoq ujartortariaqarpoq, tamanna allamik nuannarisamik ilallugu sapinngisamik nalinginnaasumik sungiusartoqartariaqarpoq. Tassa imatut oqaatigalugu; sungiusarneq assigiinngisitaartumik ingerlallugu nukiit ataatsimoortut anginerit sapinngisamik sungiusarniartarlugit.

Asseq