26. septembari 2012

Aluu tamassi,

Ateqarpunga Martin Møllerimik, timersornermik aallussilluartuuvunga, sisorarluni ujakkaarneq aamma ungasissumut arpanneq immikkut timersornermi aallutaralugit. Una blog aqqutigalugu sungiusartarnera aamma unamminerit peqataaffigisarsimasakka oqaluttuarissavakka.

Anguniagara tulleq tassa ujakkaarnermik februaarimi nunarsuarmi pissartanngorniunnissaq, VM, tassani anguniarlugu kalaallini pitsaanerpaamik arpannermi angusaqarnissaq.

Aggustimi aamma septembarimi Nuummi aamma Maniitsumi maratonerluni arpannerni kiisalu qaqqakkut arpannermi, KangNu 35 km-inik isorartussusilimmi, ajugaavunga. Soorunalimi aamma aasaanerani appannerni arpannissaq pineruinnarlugu, kisianni aamma ukiuunerani unamminissanut sungiusarnertut isigalugu, peqataasarpunga. Nuannerpoq angusassat ilaannut sungiusartuartarneq, VM qaammatit tallimat qaangiuppata pisussaq eqqarsaatigeruusaaginnarnagu.

Unamminerni peqataagaangama arpaffissat ullunik 3-4-nik sioqqullugit nerisassakka aamma imigassakka pinngitsoornanga eqqarsaatigisariaqartarpakka. Tamatuma kinguneranik arpannissat ullunik 3-4-nik sioqqullugit imermik naammalluartumik imertarpunga kulhydratertalinnillu annertuunik nerisaqartarlunga.

Ulluinnarni eqqarsaatigivallaarneq ajorpakka nerisakka, amerlanertigut assigiinngiiaartunik nerisaqarniartarpunga aamma annikitsunik arlaleriarlunga ullormut nerillattaasarlunga. Neriffissat akornisigut ullup qeqqata siornatigut ualikkullu tamussersortarpunga ullup ingerlanerani ”nukillaassanngikkuma”. Taamatut allaffimmi angerlaraangamalu eqiinganerusarpunga. Taava ajorannginnerusarpoq ualikkut imaluunniit unnukkut sungiusalaarnissaq.

Marlunnik mikisunik qitornaqarpunga sammineqarnissamik pisariaqartitsisunik, taamaattumik ataasinngornermiit tallimanngornermut sivisuumik sungiusartanngilanga. Illuatungaatigut tamatigungajalluinnaq sakkortuumik sungiusartarpunga.

Soorlu assersuutigalugu ippassaq sisoraatit assakaasullit atorlugit nuannerluinnaqqissaamik sungiusarpunga, Qinngutsinniit qattornitigut mittarfiup tungaanut. Ingerlavunga 6 x 4 minutsinik akuttussusikkaarlugit. Tassa imaappoq 4 minutsinik sapinngisamik sukkanerpaamik ingerlavunga, kingornatigut 2 minutsinik unillatsiartarlunga, taamatut pisaqattaarpunga arfinileriarlunga. Sungiusarluarsimanissamut tamanna pitsaanerpaamik kinguneqartitsisarpoq uummatip tillernera sukkasoorujussuanngortittarlugu sungiusarnerulluni, tassalu tillerneruffissap annertunerpaap 90-95 %-ia.

Qularutiginngilara angusaqarluarnerpaaffiussasoq assigiinngiiaartumik sungiusartarneq, taamaattumik aammattaaq suliffeqarfiit (Nukissiorfiit sinnerlugit) isikkamik arsaraangata ilaajuaannangajattarpunga. Sungiusarnermi nuannisaartoqartariaqarpoq, taava sungiusartarnissaq imminermut tulluartoq ujartorneqartariaqassaaq. :-)