Ilaquttat aamma piffissaqarfigineqartariaqarput. Tour de Skimut peqataanissannut sapaatip akunnera kingulleq toqqarneqareernerma kingorna nuliara qitornakkalu marluk peqatigalugit decembarip 18-ianiilli Danmarkimiippunga. Ilami arfininngornermi unamminissarput nallertinnagu allanik eqqarsaateqarlunga qasuersaalaarnera peqqinnaannarunarpoq.

Sungiusaraangama 5x4 minutsikkaarlugit kiiarlunga arpattarpunga. Qangali silami arpappunga, taamaattumik eqalerumananga sanneqqajumanangalu illup iluani arpaammi arpattarpunga. Taamaattorli sanneqqanermik kinguneqanngitsumik arpaammi sakkortuumik sungiusarsinnaasarpunga.

Tour de Skimut unammeqataanissannut piareersarneq taama ittoq pitsaanerpaajugunanngikkaluarpoq, kisiannili sungiusarnera pingaarneq qaangiutereermat sapaatip akunnera ataatsip eqqissisimaarfittut atornera ajoqutigigunarnavianngilara.

Tour de Ski arfininngornermi decembarip 29-ani aallartissaaq, Tour de Skilu unamminerup World Cupip ilagaa. World Cupip ingerlanneqarnissaa ima isikkoqarpoq:

29/12 – Sukuutserluni aallartisarneq - 4 km, Oberhof (GER)

30/12 – Qangatoorneq - 15 km, Oberhof (GER)

01/01 – Naatsumik apuunniarnerit, Val Munstir (SUI)

03/01 – Sukuutserneq - 35 km, Toblach (ITA)

04/01 – Qangatoorneq - 5 km, Toblach (ITA)

05/01 – Qangatoorneq - 15 km, Val di Fiemme (ITA)

06/01 – Sukuutserneq - 9 km, Val di Fiemme (ITA) immikkoortoq kingulleq qummukajaarluni qattunermi sangusaartarfiusumi 3 km-inik isorartutigisumi naammassineqassaaq.

Unammeqataanerma qanoq ingerlajumaarnissaa pissanngatigeqaara, pissangagaluarlungali sukataarlunga peqataajumaarpunga.

Martin