Østrigimi Sankt Ulrichimi arfininngornermi Continental Cupimi 10 km-imik isorartutigisumik ujakkaarpugut. World Cupimi siorna ajugaasoq Dario Cologna unamminermi ajugaavoq. Piukkukkaluttuinnartutut misigaanga aamma piffissami uani sisorarfiusumi aatsaat taama angusarissaartigalunga ujakkaarpunga silarsuarmilu ujakkaallaqqinnerpaaq minutsinik pingasungajannik inorlugu apuullunga.

Arfininngornermi ujakkaareernitta kingorna akunnerit sisamat atorlugit Livignomut Italiamiittumut biilerlunga apuuppunga. Uani unammiffissarput La Sgambeda 42 km-inik isorartutigisoq taamatuttaaq FIS-maraton World Cupimi immikkoortortaasoq siulleq ippoq. Biilernera sapaammi unamminissatsinnut piareersarneq pitsaanerpaajugunanngikkaluarpoq, ilaatigooriarlunili peqataaffigerusutat tamarmik peqataaffiginiaraanni sapinngisamik iliuuseqalaartoqartariaqartarpoq :-)

Unamminerpullumi nuannersupilussuuvoq ujakkaartartuusugullu 3000 missaanni amerlassuseqartugut ataatsimoorluta aallarpugut. Aallarnitsinniilli ingerlalluarpunga 20 km-illu siulliit missaanni eqimattami siuttuusumi akuullunga. Taassuma kingorna eqimattami akuusut arlallit siuttunngorput eqimattamilu akuusut taamaasillutik avissaartuullutik. Tassanngaanniilli unamminerup naammassinissaata tungaanut sapinngisamik unammeqataasugut angusaqarluarnerpaajumalluta tamaviaarluta aallartippugut.

Unamminermi Petter Northug Norgemeersoq, VM-imi arfineq-marloriarluni OL-imilu marloriarluni kuultinnassimasoq, ajugaavoq. Northugip apuutereernerata kingorna minutsinik arfinilinnik kingulliullunga normu 47-nngorlunga apuuppunga. Angusara naammagisimaartorujussuuara Italiamilu qaqqami qatsissorsuarmi unammeqataanermi kusanartumi peqataanera nuannaarutigeqalugu.

Tour de Skimut petaanissannut tooqarneqarsimanera pillugu kalerrinneqarama tusarluaqaanga. Tour de Ski World Cupinik arfineq-marlunnik ilaqartoq 29. decemberimiit 6. januar tikillugu ingerlanneqassaaq. Peqataanissara erinigisupilussuuara. Paasissutissanik allanik tunniussaqarlunga qanittumi tutsiuteqqikkumaarpunga.

Inuulluaqqusillunga
Martin