Sisamassaa Arctic Circle Racemi ajugaavunga. Arpannerup nalaani arpalluarlunga misigisimavunga qasoqqanngingajavillungalu. Ullut tamaasa misigaluni sukkasuumik arpassinnaalluni qattorngillu pikkunartut ajukkunnani ingerlaarfigisinnaallugit tupinnaqaaq :-)

Ukioq manna arpalluni unammineq pikkunarnerpaaq amerlasuutigut puigunaatsunik misigisaqarfiulluarpoq. Aatsaat taama kiatsigaaq, qaffasitsigaaq aatsaallu taama aput ilungersunartigaluni.

Kiannerunera soorunami ilorrisimaarnarneruvoq, matumani arpannitta ingerlanerani unnuiffigisartakkavut kialaarneruneri pissutaallutik isersimaarfiginissai iluarnerummat. Sila kiannerugaangat nukinnik atuineq annikinnerungaatsiartoq malunnarpoq. Akerlianilli ingerlaarfipput ACR-ip oqaluttuarisaanerani aatsaat taama portutigaaq, tassami 750 meterinik portussuseqarmat. Taamatuttaaq soorunami aamma qattorngit pisarnertut ingerlaarfigisarpavut. Soorunamili nunarsuarmi sisoraatinik oqilaniunnerit sakkortunersaat pikkunartuusussaanera pissusissamisoorpoq taamaassallunilu.

Ullukkut kiariarluni unnuakkut nillertittarnera pissutaalluni aput serminnguuttarsimavoq. Taamaattumillu sisoraatitta apummut qattunernilu qummukajaakkut ingerlaartarnissatsinnut taamatuttaaq pisarnermit ammukajaakkut sukkanerusumik sisusarnissatsinnut naleqqussarlugit pujassartarnissai ajornakusoornarsimavoq. Ammukajaakkut sisusarnissara eqqarsaatigivallaartarsimanngilara, taamaattorli ukioq manna aatsaat taama tilluusanitsitertoqartigaaq, ulortoortoqartigaaq kimillannertitertoqartigalunilu…

Linki: www.acr.gl

Asseq