Kiisami Davosimut Schweizimiittumut apuuppunga. Kalaallit Nunaanniit aallarluni aqqut takinaarnarpoq. Københavnimut timmisartoriarlunga Københavnimiit Insbruckimut aamma timmisartoqqippunga tassanngaanniillu akunnerni pingasuni biilerlunga Schweizip qaqqaasa ilaannut apuullunga.

Maani 1600 meterinik portussusilimmiissaanga sapaatiuppallu World Cupimi unammeqataannginninni sapaatip akunnerata tulliani sungiusassallunga. Portussuseq sungiunniassagakku ujakkaarfissatsinnilu sungiusarniassagama unamminissatsinnut sapaatip akunnera sioqqullugu maangarusussimavunga.

Sapaatip akunnerata ingerlanerani annerusumik eqqissillunga ullormut akunnerup ataatsip akunnerullu aappaa avillugu akornanni sivisussusilimmik sungiusartassaanga. Pingasunngorpat imminut misilittarlunga ujakkaarfissarpullu misilittarlugu unammeqataasuusaarlunga sukkalisaarlunga 10 kilometerit arpassavakka. Tallimanngorpat naatsukkuutaarlugit - minutsit marlukkuutaarlugit - kiiarlunga arpattassaanga. Taamaalioruma kingorna sukaruttussasunga ilimagaara.

Ukiumi tulliuttumi OL-ertoqarnissaanut atatillugu qanittumi Danmarks Olympiske Kommitémit ujakkaaqataasussat marluusut aappaattut naatsorsuutigineqartutut toqqarneqarpunga. Angusaqarluartarnera maluginiarneqartoq nuannerpoq. Taamaattumik sapaatit akunnerini tulliuttuni takutitsilluartariaqassaanga.

Inuulluaqqusillunga Martin