Aasaq manna sungiusaraangama siornatigut sungiusariaasera angusaqaatigilluarsimasara naapertorlugu sungiusartarnikka ingerlattarpakka. 2004-2005-imimi sungiusariaaseq taannarpiaq ingerlatereerlugu taamanikkut aatsaat taama piukkunnartigaanga, taamanikkummi ullormut marloriarlunga sungiusartarama.

Sungiusariaaseq eqqartugara sapaatit akunneranik marlunnik sivisussuseqarpoq. Ulluni qulingiluani siullerni aqqaneq-marloriarlunga sakkortuumik sungiusartarpunga, tassa arpaat 90-95%-imik sukkassuseqartillugu minutsit pingasut tallimallu akornanni sivisussusilimmik kiiarlunga arpattarpunga imaluunniit akunneq ataaseq affarlu atorlugit sukkasuumik sukkassuseq ataasiinnaq atorlugu arpattarlunga. Taassuma kingorna ulluni tallimani kingullerni eqqissillunga sunigusartarpunga. Tamatumalu saniatigut aamma Nuuk Fitnessimi nukkassarlunga sungiusartarlunga.

Qularnanngilaq sungiusartarnikka angusaqarluarninnut pissutaasut. Assersuutigalugu nunakkut 35 km-inik isorartutigisumik arpannermut KangNumi peqataagama nutaamik rekortiliivunga, matumani arpallammassuup Kim Godtfredsenip rekortiliaa kingulleq angugakku. Kim kingullermik rekortiliigami akunnerit pingasut minutsillu fammafoorut atorlugit arpappoq, ukiormannalu uanga arpaqataaninni akunnerit pingasut minutsillu arfersaneq-marluk atorlugit arpallunga. Pitsanngoriaateqarsimanera assorsuaq tulluusimaarutigalugu nuannaarutigeqaara.

Maanna allaqqittalerpunga, sapaatillu akunnerata tulliani tutsiuteqqikkumaarpunga.

Martin Møller

Asseq