Ammasuuneq, paasissutissat sukumiisut nutaarsiassallu nittartakkap nutaap ilisarnaatigai, saqqummiunneqarneranilu ilaatigut atuisut suliffeqarfimmik attaveqartarnissaannut kajumissaarneqarput. Atuisummi suliffeqarfimmut tunngasunik nittartakkatigut apeqquteqartarnissaannut atorfilinnillu aalajangersimasunit akineqartarnissaannut periarfissinneqarput.

- Royal Greenlandimit Kalaallit Nunaanni innuttaasut isummersoqatigiinnermik attaveqatigiilluarnermillu tunngavilimmik attaveqarfigerusuppagut. Royal Greenland pillugu eqqunngitsunik saqqummiisarnerit unitsikkusuppagut, suliffeqarfillu pillugu eqqortumik paasisaqartarnissaq aqqutissiuukkusupparput. Taamaammat nittartakkamik innuttaasut namminneq iliuuseqarlutik suliffeqarfimmut attaveqarnissaminnut atorsinnaasaannik saqqummiivugut, Attaveqatigiinnermi Ingerlatsisoq Káte Hansen oqarpoq.

Suliffeqarfimmit paasissutissiisarnerup ukiuni kingullerni tunulliunneqarsimanera aallaavigalugu nittartagaq inerisagaq maanna saqqummiunneqarpoq, innuttaasullu suliffeqarfiup nunarsuarmi aallussai pillugit annertunerusumik paasisaqarnissaminnut periarfissaqalerput. Ilanngullugu Royal Greenlandip sulisui qanittukkut immikkut nittartagartaassapput, suliffeqarfiup iluani attaveqatigiinnerup pitsanngorsarnissaanut aqqutissiueqataasussamik.

- Suliffeqarfimmi namminermi aammalu avammut inuiaqatigiinnut ammasuuneq attaveqatigiinnerlu, suliffeqarfiup piffissani eqqortuni apuussiviginiakkanilu aalajangersimasuni paasissutissiiniarnerani oqariartuuteqarniarneranilu pingaaruteqarluinnartuusarput. Suliffeqarfik inerisarluagaq akisussaassuseqartorlu inuiaqatigiinni avatangiiserisani akuulluartutut aammali Kalaallit Nunaata nunani allani sinniisorilluagaatut nittarsaakkusupparput, suliffeqarfissuarmi pisortaaneq Mikael Thinghuus oqarpoq.

Royal Greenland ullumikkut tallimanik nittartagaqarpoq, taakkunannga pingasut atuisartunut Danmarkimi, Sverigemi Tysklandimilu toqqaannartumik sammititaallutik. Nittartakkat imarisaat ilaatigut nittartagartaami atorluarneqarput, nittartagartaamilu saqqummiussat inerisarneqartuartussaapput.

Nittartagaq titarniusanik seqersiilluni aamma mobiilitigut saqqummersinneqarsinnaasoq, nunatsinni nittartagalerisartut DOT GL suleqatigalugit inerisarneqarpoq.

Annertunerusumik paasisaqarusuttut Attaveqatigiinnermut Ingerlatsisumut Káte Hansenimut telefon 36 13 06 imaluunniit mobilnormu 53 37 57 atorlugu paasiniaasinnaapput.

Asseq

 
 

Royal Greenland aperiguk

i
Write the text from the image