Pissusiviusut assigiinngitsut pissutigalugit, tassalu tunisassianik tulassuisut decembarimi tulaassuinissaminnik annikilliliiniarnerannik peqquteqartumik, raajaleriffimmi paarlagiiaat marluusut sulinerannik unitsitsigallarnermik kinguneqartariaqalerpoq, taamalu sulisut 35-t angerlartinneqarallartariaqassallutik. Sulisut 70-t missaanniittut tunisassiorfimmi raajalerinertik ingerlatiinnassavaat.

Tunisassiorfimmi aqutsisut naatsorsuutigaat sulisut 35-t angerlartinneqarallartussat tunisassiassanik tulaassuinerit nalinginnaasumik ingerlaqqilerpata januaarip 7-ata missaani suliartoqqissinnaassasut. Sulisut angerlartitsigallarnissat pillugit ilisimatinneqareerput.

- Sulisut tamarmik paarlagiiaatut marlutut sapaatip akunnerani ulluni tallimani suliinnarsinnaanissaannik periarfissaq misissorsimavarput. Naatsorsuinittali ersersippaat tamanna sulisunut tunisassiorfimmullu imminut akilersinnaanngitsoq, tunisassiorfimmi ingerlatsisoq Hans Lars Olsen oqarpoq.

Sulisut 35-t angerlartinneqarallartussat raajaleriffimmi, tunisassianik piuminarsaavimmi, eqqiaasutut, kantinami, tappiorannartuleriffimmi aammalu raajanik qajuusiorfimmi sulisuupput.

Aamma pikkorissartitsinissamik periarfissat misissorneqarsimapput, tunisassiorfimmili aqutsisut aalajangerput, pikkorissartitsinissat qaammatini aggersuni sikuussappat tunisassiassanillu tunisassiorfimmut tulaassuisoqarsinnaajunnaarpat ingerlanneqarpata pitsaanerussasoq.

Pissusiviusut assigiinngitut tunisassiassanik tunisassiorfimmut tulaassuisukillinissami pineqarput tunisassiorfiup tulaassuisuisa annersaasa ilaata qaammammi ilivitsumi amutsivimmi amoqqasariaqarnera, tulaassuisup allap Sisimiunut tulaassuilernissaminik aalajangernera kiisalu piffissami kingulliunerusumi aalisarnerup ukiut siuliinut naleqqiullugu annikinnerusimanera.

Asseq

 
 

Royal Greenland aperiguk

i
Write the text from the image