Ukioq manna sulisullammattut toqqarneqartup kinaanera Qasigiannguani tunisassiorfimmi julefrokostertoqarnerani aatsaat tusarliunneqartussaagaluartoq tunisassiornermi aqutsisup, Inge-Marie J. Rosingip, nalunaarutigaa. Taamaattorli Qasigiannguit Timersortarfiani jullerpalaartitsisoqarnera iluatsillugu Qaasuitsup Kommunia tunisassiorfimmit siulliulluni ukioq manna sulisullammammik toqqaavoq.

- Qaasuitsup Kommunia ukioq kingullermiilli Royal Greenland aperisalersimavaa, ukiumi pisumi kina sulisullammattut toqqarneqartussatut piukkunneqarnersoq. Ukiumi pisumi sulisullammattut toqqarneqartoq julefrokostereernitta kingorna nalunaarutigisaraluarparput, ukioq mannali julefrokosternissarput pisarnermit kingusinnerulaarsimavoq, taamaasillunilu kommuni uagutsinnit siulliulluni Ukioq manna sulisullammattut toqqakkatta kinaanera ippassaq juullerpalaartitsinermi saqqummiullugu, Inge-Marie J. Rosing paasissutissiivoq.

Inge-Mariep paasissutissiissutigaa, toqqaanermut atatillugu ima oqaaseqartoqarsimasoq julefrokosternermilu aamma oqaatigineqarumaartut:

"Ukioq manna sulisullammattut toqqagarput tassaavoq ilungersorluni suliaqartartoq sulisut aqutsisuat, Gerth Lyberth. Tunisassiornerup iluamik ingerlanneqarnissaa anguniarlugu Gerthip tamakkiisumik pikkoriffigalugu malinnaavigisinnaasimavaa. Suliniutit peqataaffiginissaanut suleqataaneq, tunisassiornerup pitsaanerusumik ingerlanneqarlernissaanut sulineq sulisullu ataqatigiissaarnissaanut sulineq pikkoriffigisupilussuuai. Ammallunilu ileqqorissaarluni ajornartorsiutinik aaqqiisarpoq. Suleqatinit nuannarineqartuuvoq, inuk nuannaartuullunilu akuersaartuuvoq.”

- Gerth Lyberth pisassarilluinnakkaminik nersorneqarnerani pilluaqqungaarparput, Inge-Marie J. Rosing naggasiivoq.

Asseq

 
 

Royal Greenland aperiguk

i
Write the text from the image