Esmar Bergstrøm misiligutitut ilinniartitsinermi siunnersortitut atorneqarpoq.

- Kilisaatit qaavanni sulineq nukersornarpoq, inuttattalu ilaat utoqqasaanngulerput. Taakku pikkorissut misilittagallillu pigiinnarusukkutsigit arlaanik iliuuseqartariaqarpugut. Taamaattumik taakku misiligutitut 3. gradimik angallatini naalaganngortinniarlugit ilinniartilerpagut. Marluinnaat angallammik ingerlatsisinnaanermut uppernarsaatillit tuluttoorsinnaareersullu toqqarsimavagut. Erseqqissaatigissavara tassa allat qinnuteqarfigisinnaanngimmassuk, kilisaatini inuttalerinermi ingerlatsisoq Christian Laursen oqarpoq.

Misiliguterput iluatsissappat pilersaarpugut ilinniartitsinerput nalilersorniarlugu, kingornalu sukumiinerusumik umiarsuarni inuttanut ilinniarfissatut neqeroorutiginissaa takorloorsinnaallutigu.

Ilinniarneq immikkoortukkuutaanik katitigaasoq Nuummi Royal Greenlandip qullersaqarfiani, kilisaatini, Skagenimi Esbjergimilu ingerlassaaq. Ilinniarneq internetikkut ingerlanneqarpoq ima paasillugu, atuakkersorluni suliassat mailikkut nassiunneqartarmata, inernerilu aamma taamatut utertinneqartarlutik. Royal Greenlandip tamanna aatsaat misilippaa.

Ilinniartut atuartitsissuni ukunani atuartinneqartarput: umiarsuarmik aqutsineq, qallunaatut, matematik tuluttullu. Tuluttoortarput immakkut aqqutinut malittarisassat tuluttuujummata. Atuartitsissutit allat tassaapput silasiorneq, imarsiortuuneq, teknikkilerineq motoorilerinerlu, kingulliit Saviminilerinermik Ilinniarfik suleqatigalugu ingerlanneqarlutik. Atuartitsineq ilinniartut sulinngiffiani, sapinngisarlu malillugu umiarsuarni angalaneranni ingerlanneqartarpoq. Angallatini naalakkanit 1. gradiusunit suliassaminnik ikiorneqartarput.

- Ilinniartitsineq ingerlassaaq oktober 2012-imit 2013-imi ukiap tungaanut. Angallatinut naalaganngorniat ilinniarfiat matoqqavoq, Paamiuniillu allamut nuunnissaa Royal Greenlandip utaqqisinnaanngilaa. Taamaammat aalajangersimavugut misiligutitut suliaq aallartittariaqartoq. Angallatinut naalaganngornianut ilinniarfimmik nunatsinni amigaateqarpugut, tassalu RAL allallu assigalugit nammineq inuttagut angallatini naalagassatut aquttussatullu ilinniartittariaqalerpagut. Taamaaliunngikkutta nunatta avataaneersunik atorfinitsitsisariaqassagatta, ingammik savalimmiormiunik, Christian Laursen naggasiivoq.

Ilinniartut soraarummeerlutik angusigunik 3. gradimik angallatini naalaganngussapput. Kilisaatini minnerni naalaganngorsinnaapput, umiarsuit ilaanni aquttuusinnaallutik, allanilu kilisaatit angisoorsuunngippata aquttuunerusinnaallutik.

Allattoq: Bula Larsen, bula@royalgreenland.com
Asseq: Christian Laursen

Asseq

 
 

Royal Greenland aperiguk

i
Write the text from the image