Inuusuttut anguniagaqarusulluartut aalisakkeriveqarnerullu tungaatigut aqutsisutut atorfeqalerusuttut suliniut ineriartorfiusoq qaammatini 18-ini sivisussusilik suliffeqarfimmilu atorfigissaalersinnaanermut aqqutissiuisinnaasoq maanna peqataaffigisinnaanngorpaat.

Suliniut International Management Trainee aqqutigalugu Royal Greenlandip suliffeqarfissuani pingaartumillu Kalaallit Nunaanni aammali suliffeqarfissuarmi tamarmi ilinniarluarsimasunik aqutsisunik immikkulluunniit ilisimasalinnik atorfeqartitsilernissani qulakkeerniarusuppaa.

- Royal Greenlandip Kalaallit Nunaanni suliffeqarfiit annersaattut kalaallinik inuusuttunik ineriartortitsinissaq kaammattuiffigalugu peqataaffigerusuppaa. Ineriartortitsilluni suliniut naammaginartumik naammassineqarpat suliffeqarfitta ilaanni atorfinivinnissamik neqerooruteqarniarpugut. Atorfinitsitsinerlu suliffeqarfissuatsinni nunarsuarmi sumiikkaluamiluunniit pisinnaavoq, taamaattorli suliniutip siunertarerpiarpaa piginnaasalinnik Kalaallit Nunaannut pilersuinisasq, sulisoqarnermi ingerlatsisoq Torben Reimer oqarpoq.

Inuusuttut, teknikkumut, aningaasaqarnermut niuernermulluunniit tunngasumik ingerlaqqiffiusumik ilinniagallit naammassiartuaartulluunniit – soorlu maskiinalerisut, ingeniørit, HA imaluunniit Cand. Merc. – ilinniartuutigineqalersinnaapput. Tamatuma saniatigut qinnuteqartut kalaaliussapput imaluunniit Kalaallit Nunaannut attuumassutilerujussuussallutik.

- Royal Greenland aallaqqaammut ilinniartunik marlunnik atorfinitsitsiniarpoq. Suliniummi misilittakkat nalilersorneqartuassapput siunissamilu ingerlariaqqinnissami aallaavigineqassallutik. Qularutigineqassanngilarlu suliniummi matumani anguniagaqarusuttorujussuugatta, sulisoqarnermi ingerlatsisoq Torben Reimer oqarpoq.

International Management Trainee-mik suliniut sisamanut immikkoortortaqarpoq aammalu Royal Greenlandip nunarsuaq tamakkerlugu suliffeqarfissuani sumiiffinni pingasuni-sisamani ilinniartuunissamik imaqassaaq. Immikkoortortat tamarmik immikkut qaammatini ataatsimiit sisamat tungaannut sivisussusilimmik suliassaqarfiusassapput aammalu suliffeqarfiup pikkorissaatigisinnaasaanik naleqquttunik peqataasoqarsinnaassaaq. Ilinniartut ataasiakkaat ilinniakkatik aallaavigalugit siunnersortimit aalajangersimasumit malittarineqartassapput aammalu sulisoqarnermut immikkoortortaqarfimmeersumit qanimut attaveqaateqassalluni.

Asseq

 
 

Royal Greenland aperiguk

i
Write the text from the image