Kalaallit Nunaata aaqqissuussaanik ilinniagaqartunik ussassaarinermi Royal Greenland Københavnimi Aarhusimilu 17. – 18. november 2012 peqataavoq, ilaasoralugit HR-mi Siunnersorti Ado Egede, kilisaatinilu Inuttalerinermi ingerlatsisoq Christian Laursen.

- Assut ulapippugut, inuppassuarnit Royal Greenlandimi suliffissaasinnaasunik soqutiginnittunit saaffigineqaqattaaratta. Ukioq manna teknikkimi ilinniagalinnik suliffeqanngitsunik assersuutigalugu innaallagisserisunit, maskinmesterinit saffiuunillu pussukinnartuliortartunit saaffigineqarpugut.

- Allat saaffiginnittut suliffissaqanngitsuusut tassaapput allaffissornermi sulisut, umiartortut, aquttut, assartuinermi- aamma ingerlasussanik piareersaanermi aqutsinermilu suliallit, IT-lerisut, inatsisilerituut, tusagassiortut il.il. Aammattaaq nunanit allanit assersuutigalugu Indiamit, Kinamit Europamilu nunanit Royal Greenlandimi suliffissarsiortut imaaginnavipput. Allaat qallunaatut kalaallisulluunniit oqalussinnaanngikkaluarlutik saaffiginnittarput, Ado Egede, Royal Greenlandimi HR-mi Siunnersorti oqaluttuarpoq.

Ukioq manna Royal Greenland ilinnniarfissamik nutaamik nutaarsiassaateqarluni peqataavoq, taannali kalaallinit ilinniartunit suli ilisimaneqarpallaanngilaq. Taanna tassaavoq aqutsisunngorniatut ilinniarneq (International Management Trainee) nutaarluinnaasoq. Inuusuttut anguniagaqarusulluartut aalisakkeriveqarnerullu tungaatigut aqutsisutut atorfeqalerusuttut suliniut ineriartorfiusoq qaammatini 18-ini sivisussusilik suliffeqarfimmilu atorfigissaalersinnaanermut aqqutissiuisinnaasoq maanna peqataaffigisinnaanngorpaat.

– Royal Greenland isumaqarpoq tassunga ilinniarsinnaanermut soqutiginnilerneq alliartorumaartoq, ilinniartut arlaqarnerusut periarfissaq paaseriarpassuk. Ilinniarnissamik neqeroorfigineqartut assut soqutiginnilipallapput, ilinniakkaminnillu naammassinnereerunik uterfigeqqinniarluta pilersaarput, Ado Egede naggasiivoq.

Allattoq: Bula Larsen, bula@royalgreenland.com

Asseq: Royal Greenland 

Asseq

 
 

Royal Greenland aperiguk

i
Write the text from the image