Nutarterinermit igitassanngorsimasut sisaat manngertorsinnaanngitsut Ilulissani eqqaavissuarmut igiinnarnagit tunineqarput. Teknikkimi ingerlatsisoq Jens Madsen aamma tunisassiorfimmi ingerlatsisoq Hans Lars Olsen nutarterisoqareersoq igitassat tuniniarsinnaanerlugit misissuisimapput.

Jens Madsen Hans Lars Olsenilu internettikkut ujaasisimapput sumi Danmarkimi saviminikut igitassat pisiarineqartarnersut paasiniarlugu. Uniscrap Søborgimiittoq saviminikunik pisisartoq nassaaraat, attavigigamikkulu paasivaat igitassat pisiarerusukkaat. 20 fods containeri saviminernik manngertorsinnaanngitsunik ulikkaarlugu immeriarlugu, nunarsuarmi saviminikoornermi akit qaffammata containeri nassiussimavaat. Tunisinermi aningaasartuutit tamaasa akilereerlugit 70.000 kruunit missaanni isertitaqarsimapput.

- Ukioq manna aamma iluatsilluartumik tunisivugut. Containeri ulikkaaqqeriarlugu tuniniaaqqikkatta tamatumuuna 50.000 kruunit iluanaarutigaagut. Maannalu containerip pingajussaa saviminernik igitassanik akuleriiaanik, tassa savimerngit qernertut manngertortartut, savimerngillu manngertorsinnaanngitsunik immiivugut. Aammattaaq kabelikunik Uniscrap pisisarmat tamakku ilanngussuuppagut. Nunatsinni siunissami saviminernik igitassat taamatut iliuuseqarfigineqartarnissaat pissusissamisoorpoq, oqaluttuarpoq Jens Madsen.

Madsenip eqqaavaa Qasigiannguani tunisassiorfik aamma taamatut tuniniaaniarluni pilersaaruteqartoq.

- Saviminernik igitassanik Danmarkimut tuniniaaneq pitsaavoq. Taamatummi eqqaajutigaluni saviminikuujaaneq, fabrikkillu ingerlanneranut atugassanik aningaasarsiulaarsinnaagaanni ajunngilluinnarpoq, oqarpoq Royal Greenlandip tunisassiorfinnik ingerlatsinermi immikkikoortortami pisortap tullersortaa Sten Sørensen.

Uniscrapip saviminernik sinnikut igitassallu pisiarisarpai suliareqqillugillu. Sulisartut håndværkerit, niuernermik ingerlatsisut/suliffissuaqarfiit, naasorissaasut, kommunit, allallu atuilluarnerunissaq siunertaralugu eqqagassanik nungutitsinermillu suliaqarfiusut pisiffigisarpai.

Allattoq: Bula Larsen, bula@royalgreenland.com
Asseq: John David Eriksen, jder@royalgreenland.com 

Asseq

 
 

Royal Greenland aperiguk

i
Write the text from the image