Sulisoqarnermi siunnersorti Adolf Egede ilisimatitsivoq, Royal Greenland Academy Royal Greenlandip illoqarfinni nunaqarfinnilu tunisassiorfiini tunitsiviinilu tamani pikkorissartitsinernik ingerlatsiniartoq. Pikkorissaanerit siulliit sapaatip akunnerani uani aallartinneqarput, kingulliillu upernaaru naammassineqassallutik.

Taamaasillutik tunisassiorfimmi sulisut 350-it missaanniittut taakkulu meeraat 164-it Royal Greenland Academyp ataani upernaamut pikkorissareersimassapput. Ilulissani Sisimiuni pikkorissaqataasussat ima amerlatigaat allaat pikkorissartussat eqimattanut arfinilinnut agguaanneqartariaqarsimallutik.

Ukiaanerani pikkorissarnerit siulliit Uummannami sapaatip akunnera una ingerlanneqarput, tamatumalu kingorna Ikerasak pikkorissaavigineqassaaq.

Avannaani pikkorissartitsinerit Kangaatsiami septembarip 10-ani nangeqqinneqassapput, Niaqornaarsummi Ikerasaarsummilu tunisassiorfini sulisut ilaatinneqassallutik. Tamaani Royal Greenland katersortarfimmik attartorsimavoq pikkorissaaffissamik, sammineqassappullu inuttut ineriartorneq, ilaqutariit aningaasaqarniarnerat aamma inuussutissat.

Pikkorissaasarnerit siulii assigalugit tunisassiorfimmi sulisut meerartaat, Royal Kids, Kangaatsiami ataatsimeersuaarartinneqassapput, ilaatigullu meeqqanut atugassarititaasut suleqatigiiaani qaqinneqartassapput.

Tunisassiorfinni sulisunik pikkorissaanerit saniasigut aqutsisunik ineriartortitsinerit sulisullu piukkunnarsartuarnissaat Royal Greenlandimi pingaartinneqarpoq.

Asseq

 
 

Royal Greenland aperiguk

i
Write the text from the image