Ukiup naatsorsuiffiusup tullissaanut missingersuusianik suliaqarnermut atatillugu Royal Greenlandip tunitsivinnut Namminersorlutik Oqartussanut kiffartuussinermut isumaqatigiissummut tunngassuteqartunut aningaasartuutaajumaartussat misissorsimavai. Suliffeqarfissuarlu naliliivoq nunaqarfinni Qeqertarsuatsiaani, Atammimmi aammalu Kangaamiuni tunitsivinni pitsanngorsaasimanerit pissutigalugit tunitsivinni pineqartuni ajunngitsumik ingerlatsisoqarsinnaasoq, taamalu tunitsivinnut taakkununnga 2013-imi tapiissuteqarnissaq pisariaarutissasoq.

- Taamaammat Royal Greenlandimit nuannaarutigalugu Aalisarnermut, Piniarnermut aammalu Nunalerinermut Naalakkersuisumut Ane Hansenimut allagaqaasiorluta nalunaarutigaarput, suliffeqarfik 2013-imi tapiissutigineqartussaagaluanit 7,2 millioner koruuniusuniit tapiissutinik ikililikkanik 3,2 millioner koruuninik tigusisinnaasoq – tamannalu Royal Greenlandip kiffartuussinermi pisussaaffigalugu isumagiumaagaanut allannguuteqarnavianngitsoq, Royal Greenland A/S-imi tunisassiornermi pisortaq Lars Nielsen oqarpoq.

Kiffartuussinermut isumaqatigiissummi tapiissutissatut sinneruttut 3,2 millioner koruuniusut, tunitvisinnut kiffartuussinermi isumaqatigiissuteqartinnagit ingerlatissallugit imminnut akilersinnaanngitsunut atorneqassapput. Pingaartumik pineqarput Kangaatsiami eqqaanilu tunitsiviit Royal Greenlandip ukiuni tullerni aaqqiiviginiarlugit qulakkeerniagai naammaginartumillu suliassaqartitsiniarnermik kinguneqartinniarneqartut.

Annertunerusumik paasisaqarusuttut tunisassiornermut pisortamut Lars Nielsenimut attaveqarsinnaapput mobiilimut + 299 52 38 66-imut.

Asseq

 
 

Royal Greenland aperiguk

i
Write the text from the image