Ilulissani tunisassiorfimmi ingerlatsisoq Hans Lars Olsen suleqatini ilagalugit tunisassiorfiup angallataanik Targami 30 fodsitut angitigisumi ilaallutik Qasigiannguaniit Ilulissiartillutik VHF-itigut ajunaalernermik kalerrisaarinermik tusaasaqarput. Tunisassiorfimmi ingerlatsisup kalerrisaarineq akivaa paasitinneqarporlu umiatsiaq qaleralinnik ulikkaartoq kivilersoq. Kalerrisaarisup sumiinnertik nalunaarutigaa.

Royal Greenlandip umiatsiaa ajunaalernermik kalerrisaarisut sumiiffiannut minutsit 15-it missaasa ingerlaneranni apuuppoq. Umiatsiamiittut takusinnaavaat dunkit, nammattakkat qalerallit allallu imaani puttasut. Umiatsimi ilaasut angut anersaartunngitsoq imaanit qaqippaat, Qasigiannguillu tungaannut aqqutaa tamaat uummarsarlugu, tikikkamillu ambulancilerisut uummarsaaneq nangippaat.

Umiatsiami annaassiniartumi inuttat politiinut nassuiaapput, kingornalu umiatsiap kiviffianut uterlutik imaani puttasut tamaasa katersorpaat. Politiit angallataat Sisak kingorna takkuppoq suliarlu nangillugu.

- Ullaaq manna paasitinneqarpunga angutip qaqitatta uummarsarneqarnerigalua iluatsissimanngitsoq, aammalu aalisariarnermini ernini ilagisimagaa. Ajunaarfimmut peqqaaratta inunnik allanik nassaanngilagut, Hans Lars Olsen pisimasumit sunnertissimarpaluttoq oqaluttuarpoq.

Qasigiannguani politiit ilisimatitsipput, angutip ajunaartup ilaqutai kalerrinneqareersut aammalu maqaasineqartumik ujaasineq suli ingerlanneqartoq.

Tunisassiorfimmi ingerlatsisup Hans Lars Olsenip tunisassiornermilu aqutsisup Anders Sandgreenip suleqatitik Royal Greenlandip ussassaarisarfianeersut MSC-llu Københavnimi immikkoortortaqarfianeersut suliaminnut atatillugu angallassatik Ilulissanut oqqukkiartortillugit ajunaalernermik kalerrisaarineq tusaavaat. Sulisut annassiniaqataasut tarnip pissusiinik ilisimasalinnik ikiorserneqarnissaat sulissutigineqaleruttorpoq.

Allattoq assiliisorlu: Káte Hansen, kaha@royalgreenland.com

Asseq

 
 

Royal Greenland aperiguk

i
Write the text from the image