Hotel Arthurimi kaffillertoqarnernani illoqarfimmi innuttaasut illoqarfiup aalisakkanik tunisassiorfiani siuttuujuarsimasumik naapitsipput. Tunisassiorfimmimi ingerlatsisoq 70-inik ukioqarluni ullormilu tassani ukiut 43-t matuma siorna atorfiniffimmini soraarninngussaaq.

Knud Mølgaard illoqarfiup tunisassiorfiani ukiut ingerlanerini nutaanik tunisassiortoqarnialeraangat siuttuusarsimavoq. 1970-imi septembarip 1-ani atorfinikkamili formanditut kingornalu tunisassiorfimmi ingerlatsisutut sulisuminut aqutsisuullunilu suliassanik agguaasartuusimavoq.

- Aap, ukiut 43-t amerlapput suliassat tungaasigut inuttullu atukkat tungaatigut, tassami sulisut tamarmik naammagittartuaannartuunngimmata, qujanartumilli ullut nuannersut amerlanerupput, Knud Mølgaard oqarpoq.

Kunuutip ullut ulaarpaarfiusimasut eqqaamavai, taamani arnat 50-it assaannarmik raajanik qalipaajaasarallarnerisa nalaanni. Taamanikkut aamma tunisassiorfimmi truckit palletsillu suli atugaalinngikkallarmata tunisassiorfimmi sulisut assaannaat atorlugit kapisilinnik 125 tonsinik qaammatini pingasuni tunisassiorsimagipputtaaq.

Knud Mølgaard Godhavn Shrimpimi namminersortunit pigineqartumi suligallarami tunisassiorfimmi atortut 70-ikkunni nutarterneqarneranni raajanillu qalipaajaatitaarnerani siuttuuvoq. Tunisassiorfik kingorna Namminersornerullutik Oqartussanit tiguneqarluni PROEKS-imik kingornalu aamma KTU-mik ateqalerpoq, raajalerinerlu 1998-imi unitsinneqarnissaata tungaanut ingerlanneqarluni.

Tunisassioriaatsit allat aallunneqalerput, ilaatigut assagiarsunnik qalerallillu avaleraannik tunisassiorneq:

- Tunisassioriaatsit assigiinngitsut aallartisartarnerat oqimaalaartarpoq, piumassuseqaraannili qaangigassaapput, Knud Mølgaard oqarpoq.

Qeqertarsuup tunisassiorfiani assagiarsunnik ukiullu ingerlanerani aalisarneqarsinnaasunik ullumikkut tunisassiorfiusumi, Kunuutip kingoraartissani Emil Mølgaard ukiup kingulliup ingerlanerani ilinniartiutigisimavaa. Kingoraartissaatalu ittorisimasani ataqqeqaa.

- Kunuuti inutsialassuuvoq, tamatigoortoq toqqortugaqanngitsorlu. Eqqissisimasuuvoq ilinniarfigilluarsimasannik. Siornatigut saaffigineqaraangama sukangasuumik periuseqarniartarsimavunga, Kunuutilli periusaa uannut pulanikuuvoq, ullumikkullu saaffigineqaraangama saamasumik periuseqartalerpunga, qujanartumik, Emil Mølgaard oqaluttuarpoq.

Kunuuti septembarip aallaqqaataani pisortatigoortumik soraarninngussaaq, tallimanngornerli aggustip 30-at Kunuutimut ulloq suliffik kingulliuvoq, Hotel Arthurimilu malunnartinniarneqarpoq.

Soraarninngoruit suleriniarpit?

- Apeqquterujussuaq. Pinngortitarsuarput nuannarisorujuuara umiatsiaqaramalu angalaallattaajunnaarneq ajorpunga. Aamma snescootereqarama apillaraangat pinngortitamut angalaarutigisarpakka. Aamma supputaasartarama suli sammisassaqartarumaarpunga, ukiorpanni siuttuujuarsimasoq illarpoq.

Allattoq: Káte Hansen, kaha@royalgreenland.com

Asseq: Emil Mølgaard

Asseq

 
 

Royal Greenland aperiguk

i
Write the text from the image