Thor Jacobsen siullerpaamik Kalaallit Nunaanniippoq inuusuttuulluni telegrafistitut umiarsuaq alapernaarsuut Skarven 1962-ip aasaanerani immanik itissusersiuilluni angalaartoq ilaaffigigamiuk. Danmarkimi Søværnet (sakkutuut imarsiortut) telegrafistitut ilinniarfigisimavaa.

1965-66-imi Kalaallit Nunaannut uteqqippoq Grønnedalimi radioqarfimmi nakkutilliisuunertut ukioq ataaseq suliartorluni, kingornalu Danmarkimut uteqqilluni.  

Aatsaat 1988-imi Kalaallit Nunaannut uteqqippoq ukiut marluk Uummannami KTU Proeksimi allaffissornikut ingerlatsisutut atorfinikkami. Taamani Kalaallit Nunaannut uteqqinnginnermini Danmarkimi merkonomitut ilinniagaqarsimavoq.

1991-imi ukiut marluk Royal Greenlandip Nuummi qullersaqarfiani Naatsorsuuserinermut nakkutilliisunngorpoq. 1993-95-imi Ilulissani allaffeqarluni Qeqertarsuup Tunuani nunap ilaanut immikkoortortaqarfimmi allaffissornikkut ingerlatsisuuvoq. Taamani sineriammi nunap ilaanut immikkoortortaqarfiliortoqartitsernerup nalaaniippoq.  

Sivikitsumik Nukissiorfimmi Allaffimmi pisortaariarluni Thor 1997-imi Royal Greenlandimi IT-mi siunnersortinngorpoq, 1988-imi SAP-imik ingerlatsisoqalernissaata tungaanut. Nunap ilaanut immikkoortortaqarfiit atorunnaarput, Thorimullu SAP-imi aningaaserinermi naatsorsuuserineq ilinniaqquneqarmat Danmarkiliallattaavoq. Pissanganarsimavoq, taamalu SAP tunngavigalugu ingerlatsineq atuutsilerneqariartuaarsimavoq. SAP atuutilermat allaffissornermi sulisut ikileriangaatsiarsimapput. Aperineqarsimavoq soraarninngussannginnersoq, ukiulli ingerlapput suli IT-mik suliaqartoq.

2007-imi ingerlatsinermi immikkoortortaqarfimmi Sten Sørensen ittorilerpaa tunisisartut  pillugit /tunisassiornermi naatsorsuuserinermilu nakkutilliisutut sulilerluni, tassalu maanna soraarninngornissami tungaanut taama sulivoq.  

  - Assut nuannarisimavara Royal Greenlandimi sulinera, ingammik ´ullorissat´ sineriammiittut suleqatigalugit nuannarisimavara.  Ullorissat tassaapput soorlu Jens Olsvig, Frederik Zeeb, Qitu, Jensigne Geisler aamma Josef Møller, isumaqarpungalu inuit taamaattut amerlanerusariaqaraluartut. Royal Greenlandip sulisumi pikkorissartinneqartarnissaat ilinniaqqitsinneqartarnissaallu pingaartissagaa neriuppunga, soorlu tunisinermi periaatsit maleruagassallu aammalu SAP-i atorlugu sulineq eqqarsaatigalugu, oqarpoq Thor Jacobsen.

Pinngortitap kalaallillu ilakkuminartut Thor Jacobsen sivisuumik Kalaallit Nunaanniinneranut pissutaaqataasimapput. Nuannersumik maaniissimavoq inuillu nuannersorpassuit ilisarisimasarilersimavai.  

- Kalaallit assut nuannerput ilagalugit, inussiarneqaallu. Tuniserusuttuupput, susoqalaaraangat kaffisortitsigaangamik tunisilluartartuullutik. Aamma Kalaallit Nunaanni ulluinnaap ingerlarnga Danmarkimisut sukkatiginngilaq, qallunaat ulapittorsuugaamik.  

Thor Jacobsen allat peqatigalugit Nuup kangerluani illuaraateqarpoq, tassanilu juullisiortarpoq ullut sisamat-tallimat ikinngutini ilagalugit. Ningiuni isumaqatigaa upernaaq 2013-imi soraaninngussalluni, 2012 juullisiorfigeqqaalaariarlugu. Thorip ulloq suliffissaa kingulleq tassaavoq 5. april. Danmarkimut nuussaaq, qitornani marluk ernuttanilu asasani marluk apersortittartut ukiunik ukioqartut ornissallugit.  

- Takoriartigu, immaqa arlaat aggissaaq oqarlunilu: Hej Thor, uani sulerusunngilatit? Naamik, qaangiuttooreerputit, illarpoq Thor Jacobsen.  

 Allattoq: Bula Larsen

 
 

Royal Greenland aperiguk

i
Write the text from the image