- Ukioq unammiffiusoq 2012-13 novemberimi unammisaqattaarlunga aallartippunga, aatsaallu taamak unammisaqattaartigalunga aprilimi naammassillunga. Siullermillu qujaffigerusuppassi tapersersorassinga! Ilisseqanngippat angusakka piviusunngorsimanavianngikkaluarput, oqaaseqarpoq Karl-Peter Kristensen.

-Nunarsuarmi pissartanngorniunneq ukioq manna Val di Fiemmemi, Italiami misigisaq annertunerpaavoq. 22-iinarnik ukioqarpunga, aatsaallu siullermeerlunga nunarsuarmi pissartanngorniunnermut peqataallunga.

Nunarsuarmi sukkanerpaat unammillugit sisorarpunga, isiginnaartut 45.000-t akornanni ingerlaarlunga. Naak siunnerfinniit angusaq pitsaannginnerugaluartoq ilinniarfiuvoq piumassuseqarnerulersitsillunilu siunissami peqataaqinnissamut. Ulloq taanna unammereerama 2015 VM-ertoqarnissaanut anguniagaqalereerpunga angusannik pitsanngortitsissallunga, taamanikkussamut misilittagaqarnerussaanga sulilu sungiusarluarsimanerullunga, oqarpoq Karl-Peter Kristensen.

- Unamminerit taakkunannga mikinerusut nunani assigiinngitsuni peqataaffigisimavakka Finsk sæson åbning, U-23 NM, Nord-Norsk Mesterskab, Alpen cup kiisalu Østrigsk cup. Minnerunngitsumillu nunatsinni pissartanngorniunnerit Nuummi ingerlanneqartut kiisalu Arctic Circle Race naggataarutigaakka. Ukioq unammiffiusoq naammagisimaarpara naak ilaatigut pakatsiffiusaraluartoq ajutooqqaffiullunilu, kisianni timersornermi taamak pisoqartarmat ilinniutitut tiguakka, oqarpoq Karl-Peter Kristensen.

Ukioq unammiffik nutaaq
- 1. maj sisorartartunut unammiffik nutaaq aallartittarpoq, piffissarlu sakkortunerpaaq sungiusarfiunerpaaq aasakkut ingerlanneqartarluni. Unammiffimmi 2013/14 U-23 VM aamma Val di Fiemmemi ingerlanneqartussaq anguniakkanni pingaarnerpaavoq, taassumap saniatigut World Cup ilaanni unammeqataanissara anguniarpara kiisalu unamminerit nunani assigiinngitsuni ingerlanneqartussat peqataaffigisarumaarpakka, naggasiivoq Karl-Peter Kristensen.

Allattoq:  Bula Larsen

Asseq

 
 

Royal Greenland aperiguk

i
Write the text from the image