Marius Lennert katillugit qaammatit marluk Hoverdal Amu Centerimi pikkorissareerluni annertusisamik kissarsuutinik aalaliutinik nakkutilliisutut allagartartaarpoq december 2013.

Royal Greenlandip Sisimiuni tunisassiorfiani aalaliutinik kissarsuutit nakkutigisarai, tunisassiorfimmi saffiuujunermi saniatigut.

- Pikkorissarneq sakkortunaarpara, isumagalu aallaavigissagaanni immaqa pikkorissarnermi piffissarititaasoq sivisunerusinnaagaluarpoq. Pikkunaaluppoq, atuarnermili sammisagut pisuullutik aamma angusaqarusussuseq unamminarpoq angusaqarusunnarlunilu. Sisimiuni kissarsuutigut nalinginnaasumik 8 bar naqitsinerisarpaat, kissassuseqartarporlu 175 grader, tassa aalaq pilersitaa taamak kissarsitigilersarpoq. Tamakku naqitsinerisa nakkutiginissaat pisariaqarpoq. Naqitsinermi aalaliummiit aniaffissaarukkuni kissarsuut qaartoorsinnaagami.

- Sulinermik Nakkutilliisunit piumasaqaataavoq raajanut tunisassiorfitsinni ilinniarsimasumik kissarsuutinik aalaliutinik nakkutilliisoqassasoq. Tassalu aalaliutinik kissarsuuteqanngikkutta raajanik uutsisinnaanngilagut, Hermann Petersen, Sisimiuni tunisassiorfimmik teknikkikkut ingerlatsisoq oqarpoq.

Danmarkimi pikkorissariarnermini Mariusip pikkorissaqataatalu Danstoker kedelindustri, Herningimiittoq pulaarpaat. Danstoker kissarsuutinut Biomasse kedlerinut nunarsuarmi ilisimasaqarnerpaatut siuttuuvoq. Danstokerittaaq ukiut 75-it ingerlanerini kissarsuutit assigiinngitsut ilisimasaqarfigingaatsialersimavai.

Marius Lennertip annertusisamik kissarsuutinik aalaliutinik allagartartaavi imaapput: Certifikat A kissarsuutit type 1 aamma 2-nik aserfallatsaaliuineq ingerlatsinerlu, Certifikat B kissarsuutit type 1 aamma 2-nik paarsineq, Certifikat A kissarsuutit type 3-nik aserfallatsaaliuineq ingerlatsinerlu.

Marius Royal Greenland Sisimiuni saffiuutut 2006-imi atorfinippoq. Sisimiut amutsiviani Saviminilerinermilu atuarfimmi Nuummi maskinalerisutut 1985-imi naammassivoq.

Allattoq: bula@royalgreenland.com


Asseq

 
 

Royal Greenland aperiguk

i
Write the text from the image