Royal Greenland Wilhelmshavenimi Tysklandimiittumi aalisakkanik tunisassiorfiutiminik tunisinerminut atatillugu Singaporemi ingerlatseqatigiiffiit marluk Sahara Investment Group Pte. Ltd aamma Meridian Investment Group Pte. Ltd peqatigalugit isumaqatigiissusiorsimanini pillugu 10. september 2013-imi nalunaaruteqarpoq.

Royal Greenlandip naammagisimaartorujussuaa nalunaarutigisinnaagamiuk tunisineq maanna naammassineqartoq.

Royal Greenland Seafood GmbH-mi aktiat tamaasa pisiarinnittunit pigineqalerput, matumanilu Wilhelmshavenimi aamma Royal Greenlandip niuernerup tungaatigut suliaminnik ingerlatsiinnarnissaannut aningaasatigut tapersersuilluarnissaq qulakkeerumallugu Bremenimi Parisimilu tuniniaanermi allaffeqarfiit avinneqarlutik.

Wilhelmshavenimi tunisassiorfiup tunineqarnera Royal Greenlandip 2013/14-imi ukiumoortumik naatsorsuutaanut allanneqarumaarpoq. Tunisineq aningaasatigut angusaqarnitsinnut annerusumik sunniuteqarnavianngilaq, ilanngaatissalli ilanngaatigereerlugit akiitsuvut erniallit appariangaatsiassapput, tamannalu akiitsutsinnik appartitsinissarput pillugu anguniagaqarnitsinnut iluaqutaassaaq.

Suliniutit tunisassiorfimmut attuumassutillit tunineqartut annertussusaat Royal Greenlandip maanna ingerlataasa 40 %-eripajaarpaat, kaaviaartitaasa 30%-eripajaarpaat suliffeqarfissuullu sulisuisa amerlassusaat 20%-it sinnerlugit.

Tunisineq pillugu Royal Greenlandimi pisortaaneq Mikael Thinghuus septembarimi ima oqarpoq:

”Tunisassiorfiutitta tuninera Royal Greenlandip qaffasissumik pitsaassusilinnik aalisakkanik tunisassiortutut tuniniaasutullu ilisimaneqarneranut pingaarutilimmik sunniuteqarluassaaq, matumanilu aalisakkanik Atlantikup avannarpasissuaneersunik tunisassiullammanngornissatsinnut tuniniaasunngornissatsinnullu pilersaaruteqarnitsinnut attuumassuteqarpoq"

Imalu ilassuteqarpoq: ”Wilhelmshavenimi tunisassiorfimmi sulisut tamarmik tunisassiorfimmillu piginnittunngortut tuniniaanermilu suliat tungaatigut siunissami ingerlalluarnissaannik kissaappakka.

Royal Greenland pillugu
Royal Greenland tunuliaqutani immikkut ittoq aamma aalisakkanik qalerualinnillu Kalaallit Nunaanneersunik aamma nunarsuup sinneraneersunik pitsaanerpaanik tunisassiortarnini tuniniaasarninilu aqqutigalugit atuisup nutaalianik eqqummaarinnittup pisariaqartitai tunniuttarpai. Tunisassiarisartakkavut assigiinngitsut najoqqutaralugit qalerualinnik nioqqutissanillu ineriikkanik niuertarfissuarnut aamma nerisassanik piareersariikkanik sassaalliisartunut neqerooruteqartarpugut. Nunarsuarmi immap nillertup raajaanik qaleralinnillu Kalaallit Nunaanneersunik pisiortorfiunerpaajuvugut taamatuttaaq Europami aalisakkerisuni annersaat qulit akornanniilluta.

Royal Greenland 2011/2012-imi DKK 5 mia.-it kaaviiaartippai akileraarutillu ilanngaatigereerlugit DKK 136 mio.-it iluanaarutigalugit.

Sahara Investment Group Pte. Ltd aamma Meridian Investment Group Pte. Ltd pillugit
Sahara Investment Group Private Limited aamma Meridian Investment Group Pte. Ltd Singaporemi suliffeqarfiupput. Ingerlatseqatigiiffiit ataatsimoorlutik Royal Greenland Seafood GmbH pigilissavaat, matumani Ruslandimiu aningaasaliisartoq aalisakkanik tunisassiornerup silarsuaani - annerusumik saarulliit ilaannik ammassassuarnillu aalisarnermik tunisassiornermillu ukiuni 18-init amerlanerusunit misilittagaqartoq - akitiaatinik amerlanerussuteqarluni piginnittooqataassalluni.

Asseq

 
 

Royal Greenland aperiguk

i
Write the text from the image