- Aalisakkat panertitat kalaallinit piumaneqartupilussuupput, Kalaallit Nunaannilu nioqqutissanik amigartumik tunisassiortoqarluni. Annertunerusumik tunisassiorumalluta pilersaarusiuleruttorpugut, Nunatsinni aalisakkat panertitat tunisartakkavut annertunerulersikkusukkatsigit. Ilaatigut panertitsivik Nuugaatsiamiittoq upernaami 2013-imi allissavarput. Taamatuttaaq siunissami Paamiuni panertulisalernissaq pilersaarutaavoq. Islandimeersunik panertunik eqqussisoqartarnera takusinnaagipput assersuutigiinnarsinnaavarput. Kalaallit Nunaanni suliniutigisatta saniatigut nunat allat Kalaallit Nunaanneersunik aalisakkanik panertitanik pisinissaminnut - amerlanerusunik tunisassiornerput aallarteriarpat - soqutiginnissinnaasut misissuiffigaavut, Møller Lyberth oqarpoq.

- Royal Greenland tallimanik panertitsiveqarpoq; Kangaamiuni ataaseq, Uummannami marluk kiisalu Uummannap nunarfiini marlunni tassa Nuugaatsiami Ukkusissanilu. Aalisakkat issimit anorimillu panertinneqarniassammata panertitsiviit ammanilerlugit sananeqarnikuupput. Tassa taama aalisakkanik panertitseriaaseqarpugut. Issi kisiat iluaqutigalugu aalisakkat panerniarneri sivisunerusarmat anorimik isaasoqarnissaa pisariaqarpoq. Kangaamiunili maskiinamik supoortumik anorimut naammaqqutissamik ikkussisariaqarunarpugut, Kangaamiuni tunitsivimmut akisussaasoq ingerlatsinermi ingerlatsisoq Møller Lyberth oqaluttuarpoq. Møller Lyberth aalisakkanik panertitsineq, aammalu aalisakkat allat Kangaamiuneersut, Atammimmeersut, Qeqertarsuatsiaaneersut Kangaatsiameersullu kiisalu nipisaat suai akisussaaffigai.

Kangaamiuni aalisakkanik panertitsinerit oktoberimiit martsip tungaanut ingerlanneqartarput Avannaanilu decembarimiit januarip tungaanut ingerlanneqartarlutik.

- Aalisakkat panertitsivinni tallimaasuni panertitat paneraangata katersorneqartarput kingornatigullu Royal Greenlandip nunatsinni tunisassiat immikkoortortaqarfiannut Nuummiittumut nassiutinnginnerini karsinut angisuunut poortorneqartarlutik. Aalisakkat panertitat 100-120 grammikkuutaarlugit poortoriarlugit Kalaallit Nunaannilu pisiniarfinnut tunineqannginnerini tunisassiorfimmi Nuummiittumi valse atorlugu naqillugit aqilisarneqartarput, Møller Lyberth oqarpoq.

Kangaamiuni aalisakkanik panertitsivik. Asseq: RG

Allattoq: Bula Larsen, bula@royalgreenland.com

Asseq

 
 

Royal Greenland aperiguk

i
Write the text from the image