Royal Greenlandip tapiissuteqartarnermut maleruagassiaa nutaaq marloqiusaavoq ukiumullu katillugit 850.000 kr-nik aningaasartaqarluni meeqqat inuusuttullu atuartitaanerannik ilinniartitaanerannillu aammalu inuiaqatigiinni timersornermik aallussinernik tapiissuteqartassaaq.

Tapiisarnermut maleruagassiap atuartitaanermut ilinniartitaanermullu tunngasortaa Naalakkersuisut Nunap immikkoortuisa ineriartortinnissaannut pilersaarutaanit aallaaveqarpoq.

- Paasivarput meeqqat inuusuttullu amerlasuut atuarnerminni ilinniartitaanerminnilu ilinniartitsissutini aalajangersimasuni tapersersorluarneqarnissaminnik pisariaqartitsisut. Taamaammat tapiissuteqartarnermut maleruagassiarput allanngortipparput pingaartumik meeqqat inuusuttullu atuartitaanerannik ilinniartitaanerannillu kaammattuisussamik, taamalu ilinniartitsissutini aalajangersimasuni suliniutit pikkorissarnerillu tapiissuteqarfigisalissavagut, pisortaaneq Mikael Thinghuus oqarpoq.

Naalakkersuisut Nunap immikkoortuisa ineriartortinneqarnissaannut pilersaarutaat naapertorlugu meeqqat atuarfianni soraarummeertarnerni ilaatigut erserpoq ilinniartitsissutit qallunaatut tuluttullu aammalu matematikki pinngortitalerinerlu immikkut iliuuseqarfigalugit suliniuteqarfigineqartariaqartut, aammalu atuartut ilarpaaluisa soraarummeersimanermik uppernarsaateqaratik meeqqat atuafiat qimattaraat.

- Meeqqat inuusuttullu atuartitsissutini pineqartuni tapersersorneqarnerisigut Royal Greenland inuiaqatigiinni akisusaaqataanerminik ersersitsiniarpoq. Pineqartunik aningaasatigut tapersersuineq ungasinnerusoq eqqarsaatigalugu inuiaqatigiinnut iluaqusiiginnassaaq, tassami tapiissuteqartarnerput ilinniartitaanerup qaffassarneqarnissaanut iluaqusiissammat, pisortaaneq Mikael Thinghuus oqarpoq.

Royal Greenlandip tapiisarnermut nutaamik maleruagassaqalerneragut oqaatsitigut pikkorissarnissat aamma atuaqatigiiaat, eqimattat inuilluunniit ataasiakkaat ilinniagaqalernissartik siunertaralugu atuartitsissutini pineqartuni angusarisimasaminnik pitsanngorsaarusuttut tapiiffigineqarsinnaalissapput.

Meeqqat atuarfianni atuartut, inuusuttut ilinniagallit, sivikinnerusumik sivisunerusumilluunniit suliffeqarsimanngitsut Kalaallit Nunaanni najugallit aammalu ilinniartunik siunnersuisartut, ilinniartitsisut ilitsersuisartullu tapiissutinik qinnuteqarsinnaapput.

Timersuutinik aallussalinnut tapiissuteqartarnerit Kalaallit Nunaanni Timersoqatigiit Kattuffiannik aammalu Arctic Circle Racemik aalajangersimasumik ukiumoortumik isumaqatigiissuteqartarnikkut kiisalu Elite Sport Greenlandimit piukkunnaatilittut toqqakkanut tapiissutigineqartarput.

Qinnuteqarnissamut ilitsersuut uani paasisaqarfigineqarsinnaavoq: http://www.royalgreenland.gl/kl/CSR/Tapiissutit

Asseq

 
 

Royal Greenland aperiguk

i
Write the text from the image