Kalaallit ilaat maani suliffissarsiortarput ilisarisimasaqartaramik maani suliffeqareersunik. Allat kalaallit suliffissarsiortaraluarlutik suliffittaarsinnaasanngitsut Jobcenter Integration Aalborgimit kalaaliinnarnik ikiuuisartumit ikiorneqarlutik maani suliffittaartarput. Taama oqaaseqarpoq Preben Thomsen, Aalborgimi Royal Greenlandip tunisassiorfiutaani tunisassiornermut siulittaasoq.

Laboranti Hanne Frederiksen Aalborgimi tunisassiorfimmi kalaallit sulisuusut tallimat ilagaat. Hanne 36-nik ukiulik 2005-imi allanik misilittagaqarusulluni Ilulissanit Aalborgimut nuuppoq, tunisassiorfimmilu 2007-imi sulilerluni.

- Maani tunisassiorfimmi suliffimmi avatangiisigut assut pitsaapput, suleqatigiit nunanit assigiinngitsorpassuarneersuuvugut tamattalu immitsinnut ataqqeqatigiilluta pilluta. Kalaallit Danmarkimi najugallit Aalborgimi tunisassiorfimmut suliffissarsiornissaannik innersuussinnaavakka, taama oqarpoq Hanne Frederiksen.

48-nik ukiulik Ane Kathrine Nikolajsen Maniitsormiu Aalborgimi tunisassiorfimmi raajalerisutut eqqiaasutullu sulivoq. Uia suliffeqarfimmi allami maskiinalerisuuvoq. Illoqarfimmut Jyllandimiittumut 1997-imi nuupput taamani uia ilinnialertussanngormat. Ane Kathrine nuunnginnerminni Maniitsumi ukiorpaalunni tunisassiorfimmi raajalerillunilu aalisakkerisareersimavoq.

- Maani suliffitsinni kalaaleqatigiilluta attaveqatigiilluartarpugut, kalaallisut oqaloqatigiissinnaalluta illaqattaartarluta qiimmassimaartarpugut. Tunisassiorfimmi kalaallit amerlanerusariaqaraluarpugut. Taamaattorli maani tunisassiorfimmi nunat allamiorpassuit sulisut akornanni nuannersumik suleqatigiiffiuvoq. Aamma pikkorissunik aqutsisoqarpugut, kalaaliugaluarutta, polenimiuugaluarutta, thailandimiuugaluarutta araberiugaluarutta immikkoortitsineq ajortunik, oqaluttuarpoq Ane Kathrine Nikolajsen.

Allattoq: Bula Larsen, bula@royalgreenland.com

Assiliisoq: RG, Aalborg

Asseq

 
 

Royal Greenland aperiguk

i
Write the text from the image