Tunisassioriaatsinik assartueriaatsinillu ineriartuinermut atatillugu Royal Greenlandip raajanut tunisassiorfii pingaarnerit Ilulissani Sisimiunilu poortueriaatsinik maanna misileraapput. Ilaatigut raajat 10 kiilukkaanut poortuutissanik misileraapput, taamaasiorpullu Royal Greenlandip Danmarkimi immikkoortortaqarfiani Svenstrupimi poortueriaatsimut immikkut ilisimasalik peqatigalugu.

- Karsit quleriiaat arlaqarnerusut pallemut ataatsimut qaleriiaarsinnaalernerat kingunerisussaavaa, tassalu raajat kiilukkaat arlaqarnerusut nassiussinnaalissavagut. Taamaalilluta assartuinermut aningaasartuutigut annikillisissinnaavagut, Jørgen Møller, Svenstrupimi Royal Greenlandip immikkoortortaqarfiani poortueriaatsimut immikkut ilisimasalik paasititsivoq.

- Maanna 5 kiilukkaanut puussiat atorpagut, puussiartaallu ammalungajapput. Misileraanitsinni puussiat silissisissimavagut pukkilillugillu , taamaalilluta ammut pukkinnerusunik karsiliorsinnaalerluta. Sulili 10 kiilunik (5 kiilut marluk) imaqarsinnaapput. Aammattaaq karsit poortorneqaraangamik silaannakinnerulersimapput, plastikkilu puussiamut atortoq saannerulersissimavarput, Jørgen Møller oqaaseqarpoq.

- Karsip pukkilinera taamatut pallemut arlaqarnerusunik assartuinitsinni qaleriiaarisinnaalernitsinnut pissutaavoq, containerilu ulikkaarnerusinnaalerparput, Hans Lars Olsen, Ilulissani tunisassiorfimmi ingerlatsisoq oqaluttuarpoq.

Containerittaaq nutaanik taarserneqarsimapput. Siulliit ajoqusikkajussimapput naqqi matuilu ninnguippallaarsimammata. Containerit arlallit apuukkaangamik aseroqqasarsimapput, tassalu raajat karserpassuit igiinnartariaqartarsimallutik. Jørgen Møller nutaamik containeriliortitsisimavoq ´Scantainer´, taanna manngerneruvoq allaanerusumillu suliaalluni. Allaanerusumik suliaanerata kingunerivaa arlaqarnerusunik qaleriiaarisinnaalerneq amerlanernillu kiilunik immiisinnaalerneq.

- Misileraaneq iluatsissappat iluanaarutigissavagut: Karsi akikinneq minnerusorlu, plastikki akikinneq, aammalu assartuinermi aningaasartuutit ukiumut 2–3 millionit koruunit sipaarutigissavagut, Jørgen Møller naggasiivoq.

Allattoq: Bula Larsen
Titartakkat: Jørgen Møller, Royal Greenland Svenstrup

Asseq

 
 

Royal Greenland aperiguk

i
Write the text from the image