Ilinniartut aalajangersimasunik ilinniagallit sungiusarlutik Royal Greenlandimiissinnaasut pisariaqartippavut, Ado Egede, Royal Greenlandimi HR-imi siunnersorti paasissutissiivoq. Tassaapput maskiinalerisunngorniat, kantiinami ikiortinngorniat, quersuarmi sulisunngorniat, innaallagisserisunngorniat saffiuunngorniallu. Taakku tunisassiorfinni annerusuni ilinniartuupput/ilinniartuussapput allaffimmiunngorniallu qullersaqarfitsinniittassallutik. Ilinniarsimasunik kalaallisullu oqaluttunik maanna siunissamilu pisariaqartitsineq tunngavigalugu taamatut sungiusarlutik ilinniartut Royal Greenlandip amerliartortippai.

- Maanna Ilulissani, Qasigiannguani, Sisimiuni, Nuummi Paamiunilu tunisassiorfitsinni ilinniartuuteqarpugut. Piareersarfiit paasitittarpagut inuusuttut uagutsinni ilinniartunngorniarsinnaasut, ilinniarfiusinnaasunillu nassaaraangatta ilinniartussatut neqeroorfigisarpagut, Ado Egede oqarpoq.

- Sungiusarlutik ilinniartut pineqartut saniatigut qaffasinnerusunik ilinniagallit qaammatini 18-ini internationalt management traineetut ilinniaqqissinnaanissaannut neqeroorfiginiarpavut. Taakku aqutsisussatut immikkullu ittumik specialistitut atuuffeqarlutik Kalaallit Nunaanniinnaanngitsoq aammali nunani allani suliffeqarfiutitta ataani suliffeqalersinnaanissaat siunertaavoq, Ado Egede naggasiivoq.

18-inik ukiulik Jens Pavia Mikaelsen Arsumiu Royal Greenlandip kilisaataasa ilaanni Akamalimmi motoorilerisutut ilinniarpoq. Aggustip qaammataani 2012-imi ikivoq, 2013-imilu marsip qaammataani Saviminilerinermik Ilinniarfimmut uteqqissalluni. Ukiut sisamat motoorilerisutut ilinniartoqartarpoq, Jens Pavialu 2016-imi naammassinissami tungaanut ilinniarfimminut kilisaammullu uteqattaarluni ilinniassaaq.

Assut periarfissinneqarnera iluareqaara kilisaammiinneralu nuannaralugu. Neriuppunga siunissami Royal Greenlandip kilisaataataasa ilaanni motoorilerisunngorumaarlunga, Jens Pavia Mikaelsen oqarpoq.

Allattoq: Bula Larsen, bula@royalgreenland.com

Assiliisoq: John David Eriksen, jder@royalgreenland.com

Asseq

 
 

Royal Greenland aperiguk

i
Write the text from the image