Arctic Green Foodip tunisassiorfiutigisimasai Ikamiuni Attumilu aserfallatsaalineqarsimannginnerat pissutigalugu 2012-imi matuneqarput, taamaalillutillu tunisassiornissamut akuersissut annaallugu. Fødevarestyrelsenimit (inuussutissalerinermik oqartusaasut) tunisassiornissamut akuersissuteqanngikkaanni aammalu EU-p tunisassiorfeqarfinnik akuerisaasimasunik allattorsimaffianut akuunngikkaanni tunisassianik avammut nioqquteqartoqarsinnaanngilaq, Nauja Heiselberg, Royal Greenlandimi pitsaassusilerinermik ingerlatsisoq oqarpoq.

Fødevarestyrelseni Ikamiut tunisassiorfiani aserfallatsaaliisoqarsimannginneranik erseqqissaavoq 2011-mi 2012-imilu. Nalunaarutaani atuarneqarsinnaavoq nateq aseqqukuusoq, matut isaaviit matulluarneqarsinnaanngitsut, iikkat quppaqartut, ruujorit oqorsaataat aseqqukuusut, iikkat, sukat atortullu allat qaavi katagartut manngertorneqarlutillu. Ikamiuni aasaq 2012-imili tunisassiortoqarsimanngilaq.

Attu pillugu aserfallatsaaliisoqarsimannginnermik erseqqissaasoqarpoq ukiuni 2009, 2010 aamma 2011-mi, Fødevarestyrelsenip nakkutilliiartorluni angalanerani. Nalunaarusiami atuarneqarsinnaavoq tunisassiorfittaani nateq aseqqukuusoq, matut, igalaat, saavilu ajoquteqartut, tarajorterivimmut poortuisarfimmullu matu taarsigassaasoq, aammalu qerititsiviup matua allunaasaannarmik atortulerluni matuneqarsinnaasoq. Sikuliuut nillataartitsivik aseqqukuusoq aammalu inimi atisalersortarfimmi kissartumik imeqanngitsoq. Aammattaaq silaannarissarfiit, innaallagiamut sikaavik ruujorillu manngertorneqasut, tunisassiorfimmilu qalipaat katagarluni pisoqalisimasoq.

Arctic Green Food kiffartuussinissamut tapiissutinik pisarsimagaluarpoq, aalisakkanik tunisassiorsinnaanissamut akuersissut pigiinnassagunikku ataavartumik tunisassiorfinni pineqartuni allanilu allaaserisami taaneqanngitsuni aserfallatsaalinermut atugassanik. 

- Attumi tunisassiorfik qimaannakkatut isikkoqarpoq. Aserfallatsaaliinissamut pilersaarusiortariaqarpugut. Tamannalu imaasiallaannaq pisinnaanngilaq, piffissarlu ingerlangaatsiareerpat aatsaat ammaaqqissinnaassagunarpugut. Tunisassiorfiit pineqartut sanasunik nalilertittariaqarpagut, maannalu tamanna iluamik pisinnaanngikkallarpoq inuppassuit aasaanerani sulinngiffeqaramik, Sten Sørensen, Royal Greenlandimi ingerlatsinermi ingerlatsisoq oqarpoq.

Sten Sørensen Royal Greenlandimi tunisassiornermut pisortaa Lars Nielsen peqatigalugu Ikamiuni Attumilu tunisassiorfiit takuniarsimavaat.

- Aatsaat aasaanerani sulinngiffeqarfik naareerpat inuit takuniaatissinnaassavagut naliliiartortillugit suut suliassaanersut atortunillu sunik amigaateqartoqarnersoq il.il. Taaneqareersut saniatigut allaaserisami pineqartuni sumiiffinniittuni aalisartut eqqartueqatigiumaarpagut periarfissat qanoq innersut pillugit. Paasisinnaavarput aalisartut Attumi Ikamiunilu siunissami qanoq pisoqarumaarneranik pissanngateqassappata. Kisiannili tunisassiorfiit taamak ajortigitillugit sukkasuumik ammaasinnaanngilagut. Inuit nukii aningaasallu atortariaqassavagut tunisassiorfinnik aaqqiiniarnitsinni. Aammalu tunisassiorsinnaanermut akuersissutinik nutaamik qinnuteqaqqittariaqassaagut aalisakkanik tunisassiorneq aallarteqqinneqassappat, Sten Sørensen naggasiivoq.

Allattoq: Bula Larsen

Asseq

 
 

Royal Greenland aperiguk

i
Write the text from the image