Jens K. Lyberthip qaninnertut qullersarissavaa suliffeqarfissuarmi pisortaaneq Mikael Thinghuus, sulilissallunilu 1. august 2013. Jens K. Lyberth Royal Greenlandip Nuummi qullersaqarfiani katersuuffiussaaq, suliffeqarfissuarmillu avammut kattuffinnut, pisortanut tusagassiuuteqarfinnullu attaveqarnermut akisussaasuussaaq.

"Assut nuannaarutigaara Jensi Royal Greenlandimi atorfeqalernissaanik akuersaartissimagakku," pisortaaneq Mikael Thinghuus oqarpoq. "Jensip Kalaallit Nunaanni aalisarnermik inuussutissarsiorneq ukiorpassuarni suliaqarfigisimasani sukumiisumik itisuumillu ilisimasaqarfigaa, tassalu Royal Greenlandip suliniuteqarfiinut misilittakkatsigullu pisariaqartitaanut neriuutigisatsitut tulluulluinnartuulluni."

"Ukioq kingulleq qullersaqarfimmi sulisugut 51-init 62-inngorput, taamaattumillu ulluinnarni qullersaqarfimmi suliaqarfiusuni amerlasuuni katersuuffiusussamik pisariaqartitsivugut", Mikael Thinghuus nangippoq.

Qullersaqarfimmik nukittorsaaneq Royal Greenlandip nutaamik iliuusissaanut tulluartuuvoq, tassani ingammik Royal Greenlandip atlantikup avannaaneersunik aalisakkanik pisarisartagaanik pisiarisartagaanillu niuernermi suliffeqarfissuarmut pingaaruteqarluinnarmat.

Jens K. Lyberth ukiorpassuarni kalaallit kattuffii pisortallu qanimut suleqatigisimavai, taakkulu tassa Royal Greenlandip suli ineriartuinnarnissaanut suleqatissatut pingaaruteqartuupput.

Royal Greenlandimi suleqatit peqatigalugit, aamma aalisarnermik inuussutissarsiorneq, sulisitsisut, sulisartut kattuffii, kommunit Namminersorlutillu Oqartussat suleqatigalugit Royal Greenlandip Kalaallit Nunaanni suliniutai annertusisassavai. Tamannattaaq politikikkut kissaataasunut, partiinit minnerunngitsumillu Aalisarnermut, Piniarnermut Nunalerinermullu Naalakkersuisumit Karl Lyberthimit kissaatigineqartunut naapertuuppoq.

Jens 57-inik ukioqarpoq, 1982-imilu ingeniøritut naammassinermi kingorna Danmarkimi, Savalimmiuni, Tuluit Nunaanni Kalaallillu Nunaanni ukiut katillugit 17-ini aalisarnermut tunngasunik atorfeqartarluni, ukiut kingullit pingasut Aalisarnermut, Piniarnermut Nunalerinermullu Naalakkersuisoqarfimmi pisortatut sulilluni.

Paasissutissat allat pissarsiarineqarsinnaapput uunga attaveqarnikkut:

Mikael Thinghuus

+45.5089.3000

Asseq

 
 

Royal Greenland aperiguk

i
Write the text from the image