Aappilattumi angut tunisassiorfik pillugu oqaluttualaarsinnaasoq sianerfigigatsigu annakkuummerpaluppoq. Tunisassiorfimmut matuersaatit ukiut pingasut missaanni paarisarisimavai.

- Arctic Green Foodip akiliisinnaajunnaarnera pillugu nutaarsiassani tusaratsiguli tunisassiorfik pillugu aatsaat attavigineqarpunga. Akiliisinnaajunnaarnera nutaarsiassaareermalli AGF-mit ilisimatinneqanngisaannarpugut. Feriepengisiassaguulluunniit suli tigunikuunngilagut, Sikesmund Gedionsen, tunisassiorfimmik nakkutilliisimasumit tunisassiorfiup matuersaataanik kingornussilluni paarisaqalersimasoq oqaluttuarpoq.

Arctic Green Food nittartakkamini tunisassiorfik pillugu tallimanngornermi juunip 14-iani paasissutissaatimini ilaatigut allassimasuuteqarpoq, tunisassiorfik 368 kvadratmeterinik angitigisumik tunisassiorfeqarluni toqqorsiviuteqartoq, inuussutissalerinermillu oqartusaasunit tunisassiorsinnaanissamut akuerisaaniassammata ataavartumik nutarterneqartuartuusut. Ilanngullugu allassimasoqarpoq imaq nunaqarfiup avataaniittoq ukiuunerani sikuusanngimmat immap pisuussutaanik atorluaanissaq ajornanngitsuaraasoq.

Nittartakkami paasissutissat taakku ataasinngornermi juunip 17-iani nittartagaq alakkaratsigu piiareerneqarsimapput.

- Tunisassiorfik aalisakkanik tunisassiorfittut 2004-imili atorneqaqqinngilaq, siornalu paarnanik poortuitsiarpugut Pilersuisullu qerititsiviutaani qeritillugit. Nunaqarfiup avatinnguani qaleralippassuaqaraluarpoq. Aalisartorpaaluit tamaani aalisarluartarput Narsami tulaattakkaminnik, Sikesmund Gedionsen oqaluttuartutsianngorpoq.

- Tunisassiorfiup toqqavia cementiusoq quppaqartiterpoq nakkaaneqartiterlunilu, illup ilaata qisuttaa aavoq, kisianni aamma nutaamik atoriaannarmillu qerititsivissaqaraluarpoq, nunaqarfiup aqutsisuisa siulittaasuat Angajo Manassen tunisassiorfiup siunissaa pillugu neriulluartoq oqaluttuarpoq.

Royal Greenlandip paasisai tunngavigalugit Aappilattumi tunisassiorfik qimaannagaq tunisassiorfiit qulit pisiarineqartut ilaasa pingasut tunisassiornissamut akuersissuteqanngitsut ilagigaat. Tunisassiorfiit Illoqqortoormiuniittoq Savissimiittorlu aamma tunisassiorsinnaanermut akuersissuteqanngillat.

- Tunisassiorfik nutartertarialiuvoq qerititsivittaqaranilu. Maniitsumi AGF-ip sulisua siorna tunisassiorfimmik misissuiartorpoq. Oqaatigaa tunisassiornissamut amigaateqartoq, kisiannili aallarmalli tusagaqaqqinngilagut, Sikesmund Gedionsen oqarpoq.

Royal Greenland naliliivoq Maniitsumi Qaanaamilu tunisassiorfiit tunisassiorfinnit quliusunit kisiartaallutik pilertortumik tunisassiorsinnaalissasut. Tunisassiorfiit sinneri Ikamiuni, Attumi, Aappilattumi, Savissimimmi, Napasumi, Qassimiuni, Narsarmijini aammalu Illoqqortoormiuniittoq aasaanerani sulinngiffeqareernerup kingorna misissuiffigiartorneqassapput, kingorna ataasiakkaarlugit pilersaarusiorfigineqarniassammata.

Allattoq: kaha@royalgreenland.com

Asseq: Aappilattoq

Asseq

 
 

Royal Greenland aperiguk

i
Write the text from the image