Piffissami matumani pineqartumi akileraareernermi angusat 53 millioner koruuniupput.

Kaaviiaartitat seks procentimik qaffariarlutik 2,9 milliarder koruuniupput.

Suliffeqarfiup akiitsui erniallit 71 million koruuninik ikilisinneqarput maannalu 1,6 milliarder koruuniulerlutik, ukiullu qulit kingulliit eqqarsaatigissagaanni kisitsit aatsaat taama appasitsigaaq.

- Ukiup affaata siulliani angusat siornatulli qaffasitsiginngillat, ingerlatseqatigiiffiulli oqaluttuarisaanerani angusat pitsaanersaasa aapparalugu. Angusat ataatsimut isigalugit naammagisimaarpagut. Tamatuma ersersippaa Royal Greenland maanna suliffeqarfittut ima patajaatsigilersoq allaat iluanaaruteqarnissaminik attassisinnaalerluni – aamma avataani pissutsit unammillernartoqaraluarpataluunniit, pisortaaneq Mikael Thinghuus oqarpoq.

Raajartassiissutit ikiliartoraluartut raajanik tunisassiat pitsaasumik ineriartorfiupput. Royal Greenland niuerfinni akitigut pitsaasumik inissisimatitsisinnaasimavoq. Ilulissani aamma Sisimiuni tunisassiorfinni pitsanngorsaalluni aningaasaliinerit tunisassiornermut sunniuteqarluarsimapput.

Angusaqarneq arlalinnik pissuteqartutut isiginiarneqassaaq. Niuernermi piumasaqaatit sakkortuseriarnerat nipisaat suaasa saarulliillu akiisa apparnerannik kiisalu Japanimiut aningaasaasa yenip nalingata syv procentimik apparneranik ilaqartoq ingerlatseqatigiiffimmut unamminartoqarsimavoq. Tamatuma saniatigut tunisassiassat akii siorna ukiup taamaalineranut naleqqiullugu 26 procentimik qaffariarput.

- Unamminartut marluk naatsorsuutinut tamaviaarnarsisitsipput. Nunarsuarmi niuernermi saarulliit akiisa 25 procentimik appariaateqangaatsiarnerat annerusumik pissutigalugu angusat appasinnerupput.

Kalaallit Nunaanni tunisassiorfinni mikinerusuni tunisassiornerup qerititsiviuteqarnerullu tungaatigut aningaasaliingaatsiareernitsigut nunarsuarmi niuernermi akit tungaatigut ineriartorneq unamminartoqarsimavoq. Taamatuttaaq kapisillit tunisassiassat akiisa qaffakkiartornerat pissutigalugu ukiumut kingullermut naleqqiullugu pujuukkanit appasinnerusumik iluanaaruteqartoqarpoq, Mikael Thinghuus oqarpoq.

Ingerlatseqatigiiffiup ineriartornissaanut ilimagisat

Ukiup affaata siulliani unamminartoqarnerata kingunerisaanik ukiumut kingullermut naleqqiullugu 2012/13-imi appasinnerusumik angusaqartoqarnissaa ilimagineqarpoq. Taamaattorli angusat pitsaasumik inissisimajuarnissaat ilimagineqarpoq, matumanilu akiitsut erniallit 1,4 milliard koruuninut ikilisinneqarnissaat ilimagineqarluni.

Nunarsuarmi aningaasaqarniarnermi nalorninartoqarnera niuerfinnut tunisassiallu piumaneqarnerannut suli sunniuteqarpoq. Taamatuttaaq Kalaallit Nunaanni pingaartumik qaleralitsigut raajatigullu suli sukannernerusumik unammillertoqaleriartornera ilaatigut nalorninartorsiortitsisussaassaaq.

2012/13-imi ukiup affaani siullermi kisitsisit pingaarnerit uani aasinnaavatit.

Asseq

 
 

Royal Greenland aperiguk

i
Write the text from the image