Royal Greenland Sahara Investment Group Private Limited aamma Meridian Investment Group Pte. Ltd. isumaqatigiissinnaanermik oqariartuutilimmik isumaqatigiissuteqarput, atsioqatigineqartullu marluullutik, isumaqatigiissutaajumaartussaq apeqqutaatillugu, Royal Greenland Seafood GmbH-mi piginneqatigiissutinik tamakkiisunik piginnittuulissapput, taaakkuuppullu Tysklandimi Wilhelmshavenimi aalisakkanik tunisassiorfeqarfimmi aallussat, pingaarnertut nalillit ingerlatsinermilu aallussat pineqarlutik, kisiannili Tysklandimi Cuxhavenimi nipisat suaannik tunisassiorfiit aammalu tunisassiat ziplock/chain-pack-inik taaneqartartut ilanngunnagit.

Illua'tungeriit tunisisinnaanermut periarfissanik maanna misissuileruttorput. Illua'tungeriit misissuinerminnut atatillugu Europami niuerfigisartakkanut aalajangersimasunut tuniniaasinnaanissaq taamalu pisiniartigisartakkanut ataveqarluarneq attatiinnarumallugulu nukittorsarniarlugu aammalu Wilhelmshavenimi tunisassiorfimmit tunisassianik pilersuisinnaaneq kiisalu Royal Greenlandip tunisassiaanik tunisaqarsinnaaneq qulakkeerumallugu illua'tungeriit suleqatigiissinnaanermik eqqarsaateqarput.

Wilhelmshavenimi susassaqarfinnik tunisisinnaaneq Royal Greenlandip suliffeqarfittut pilersuinikkut niuernermik aallussaqarnissaanik pingaarnertut anguniagaqarneranut naapertuuppoq, taakkulu pingaarnertut Atlantikup avannaani pisarineqarsinnaasunik Royal Greenlandillu Kalaallit Nunaanni pisaralugillu pisiarisartagaanit tunngaveqarput.

Mikael Thinghuus Royal Greenlandimi pisortaaneq oqarpoq:

- Wilhelmshavenimi tunisassiorfik 1996-imi pisiarineqarneraniilli Royal Greenlandimut ineriartortitseqataasimavoq. Tunisassiat pitsaassusaat, tunisassiorfiup naammassisaqarsinnaanera aammalu pisisartunik attaveqarneq Europami niuerfigineqartartuni unammilleqatigiiffioqisuni naliitsuusimapput suli taamaallutik, tamannalu Royal Greenlandip Europami pisiniarfissuit neriniartarfillu ilaannut tunisassianik iluatsitsiffiusumik pilersuisinnaaneranut pisooqataasimavoq.

- Wilhelmshavenimi susassaqarfiit Atlantikup avannaani susassaqarfigisatsinnit aalisarnikkut tunitsivigineqartarnikkullu akuuffigisatsinnit allaanerupput. Aalisarnermi, tunisassiornermi aammalu pisisartoqarnikkut akisussaaffeqarnissarput orniginartinneruarput. Wilhelmshavenimi allussat pingaarenerit aalisakkanik qaqortunik nerpilinnik nammineq aalisaqataaffigisimanngisatsinnit pisunit tunisassiaapput.

- Wilhelmshavenimi tunisassiorfik ukioq kingulleq aalisakkanik qaqortunik nerpilinnik tunisassiassanik 58.400 tonsinik tunisassiorpoq. Tunisassiorfik tunisassiorfimmi, ataqatigiissaariffimmi, pitsaassusileriffimmi aammalu allaffeqarnikkut 400-t sinnerlugit sulisoqarpoq. Suliffeqarfiit tuniniaasartut suleqatigiilernissamik isumaqatigiissuteqarfiginiakkat suliffeqarfimmut sulisunik 50-inik ilasiniarput.

Annertunerusumik paasisaqarusuttut pisortaaneq Mikael Thinghuus mobilnormumi +45 50 89 30 00 oqaloqatigisinnaavaat.

Royal Greenland pillugu

Royal Greenlandip oqaluttuarisaaneq aammalu imarmiunit nerisassiat akimasuut pitsaalluinnartullu Kalaallit Nunaanneersut nunarsuarmeersullu allat aallaavigalugit atuisartut nutaaliaasut piumasaqarnerat naammassiniartarpai. Tunisassiatsigut qinigassaqarfiulluartutigut aalisakkanik tunisassianik aammalu ineriikkanik niuertarfinnut neriniartarfinnullu neqerooruteqarsinnaavugut. Raajanik immamit nillertumeersunik aammalu kalaallit qaleraliutaannik nunarsuarmi pilersuisut annersaraatigut aammalu Europami aalisakkanik tunisassiortut qulit pitsaanerpaat akornanniilluta. Royal Greenland 2011/12-imi 5 milliarder koruuninik kaaviiaartitaqarpoq akileraarutillu ilanngaatigereerlugit 136 millioner koruuninik sinneqartooruteqarluni.

Sahara Investment Group Private Limited aamma Meridian Investment Group Pte. Ltd. pillugit.

Sahara Investment Group Private Limited aamma Meridian Investment Group Pte. Ltd. piginneqatigiiffiupput Singaporimit aallaavillit. Piginneqatigiiffiit peqatigiillutik Royal Greenland Seafood GmbH pigilerusuppaat, russimillu aningaasaleeqataasimasumik pingaarnertut piginneqataasoqarlutik, taannalu aalisakkanik tunisassiornermi ukiut 18-it sinnerlugit akooreersimavoq, pingaarnertullu aalisarnermi aammalu aalisakkanik qaqortunik nerpilinnik ammassassuarnillu tunisassiornermi aallussaqarsimalluni.

Asseq

 
 

Royal Greenland aperiguk

i
Write the text from the image