Aalisakkerisussat 17-iusut amerlanersai maanna Uummannamut tikerarput aalisakkerilerlutillu. Siullermik septembarip qeqqata missaata tungaanut aalisakkerissapput, taava kingusinnerusukkut ingerlaqqissanersut naliliisoqarumaarpoq.

- Apeqqutaavoq qalerallit qanoq annertutigisut tunineqartarumaartut. Uummannami aasaanerani ukunannga aalisakkeriartortoqarpoq: Upernavik, Kullorsuaq, Aasiaat, Illorsuit, Niaqornat, Sisimiut Kangaatsiarlu. Uummannarmiut arlalissuit maanna sumut tamaanga teqqakaapput aalisariutinut ikiorarlutik, taamaattumik avataanit aalisakkerisussat ikiorniarluta tikerarmata iluareqaarput, Abia Thorleifsen, Uummannami tunisassiorfimmi ingerlatsisoq oqarpoq.

- Nunaqarfinni aalisakkerisussarsiornerput aamma naammassingajalerpoq. Ajoraluartumilli Nuugatsiami najugarisassanik inissaalatsitsivugut, Lena Jensen, Royal Greenlandimi sulisoqarnermi ataqatigiissaarisoq oqarpoq.

Qasigiannguit

Aalisakkerisussat 15 –it Qasigiannguanut 31. maj aamma 2. Juni Aasiannit, Upernavimmit, Maniitsumit nunaqarfinnillu tikerassapput.

- Paarlakaajaallutik ullukkut unnukkullu sulisassapput. Arlaat kantiinami, tunisinermi quersuarmiluunniit sulinissaminnut pikkorissuseqarpata taakkunani sulisikkumaarpagut. Qaasuitsup Kommunia blokkini marlunni qulinik inissiartalinni inissaqartitsivoq. Aalisakkerisussat oktobarip qeqqata missaata tungaanut isumaqatigiissutit malillugit sulissapput, Ole Vestergaard, Qasigiannguani tunisassiorfimmi ingerlatsisoq paasissutissiivoq.

59-inik ukiulik Nathaniel Møller Maniitsormiu aalisakkerilernissaminut qilanaarpoq. Siusinnerusukkut ukiukkut Kangerlussuarmi neqilerisutut allagartaqarami umimmalerilluni sulisimagaluarpoq, maannali Arctic Green Food matummat Royal Greenlandimi aasaanerani aalisakkerinissaq periarfissatsialaasutut qujakkunnartutut isigaa.

- Naatsorsuutigaara piffissaq tamaat aalisakkerissallunga. Periarfissaq suliffissaqannginnermit ajunnginnerummat iluatigeqqissaarpara. Paneqarpunga nammineq suliffiutilik, anaananili kisiat atorfinitseqqavaa. Ernuttannut maqaasissaanga, kisiannili ajornavianngilaq suliffissaq pissanganarmat. Qasigiannguani nalunngisaqarpunga, taakkulu ilimagaara pulaartassallugit, Nathaniel Møller oqaluttuarpoq.

Paamiut

Aalisakkerisussat 23-t Paamiunut sap. ak. 22-mi tikerarput, taakkulu Kujataaneersuupput illoqarfinnit ukunannga: Nanortalik, Qaqortoq nunaqarfittaanillu, aamma Narsaq. Royal Greenlandip inissianut inoqanngitsunut kommunimit attartukkanut inissaqartippai.

Sumiiffinni pineqartuni tamani najuqavissut ataasiakkaat aamma aasaanerani aalisakkeriniarlutik nalunaarsimapput.

 Allattoq:Bula Larsen

Asseq

 
 

Royal Greenland aperiguk

i
Write the text from the image