Ukiorpassuit ingerlanerini Royal Greenland naliliisarnerni appasissumik inisseqqasarpoq. Tamatumunnga suliffeqarfissuup pitsaanngitsumik angusaqatarsimanera aamma aningaasaliiffigineqartarneranut tunngasutigut pitsaanngitsumik tusagassiuutitigut eqqartorneqartarnera ilaatigut pissutaasimapput.

2011-mit siumut inuussutissarsiorlutik ingerlatsisut suliffeqarfiit angusaqarluarsimasut akisussaassuseqarlutillu tatiginartumik ingerlatsisut akissarsisittarpai. Ataatsimut isigalugu Royal Greenlandi inissisimanermigut 2012-imit 2013-imut normu 96-imit normu 82-imut inissippoq. 2011-mi Royal Greenland appasissumik inisseqqavoq normu 115-iulluni.

Qaffatsitsisoq tassaavoq tatiginassuseq. Royal Greenland 2012-imi normu 92-imit 2013-imi normu 66-inngorpoq. Qularnanngilluinnarpoq ukioq kingulleq angusarisat suliffeqarfissup tamarmiusup anguniagarisimasaasa kingunerigaat. Aqutsineq eqqarsaatigalugu suliffeqarfik 18-inik siuariarpoq, taamaalillunilu inuussutissarsiornermik ingerlataqartut Royal Greenlandip ajunngitsumik ingerlalersimaneranik isumaqarnerat annertusillugu.

Inuussutissarsiornermik ingerlataqartut malunnartumik isumaqarput Royal Greenlandip pitsaassuseq pingaartitarigaa aammalu suliffeqarfiup akisussaasuseqarluarluni CSR-imillu tunngaveqarluni sulilernera nuannaarutigigaat, kiisalu taamatut sulinerup attaveqatigiinnikkut avammut siaruarteruunneqarnerata iluarineqariartornera malunnarsiartortoq isumaqarfigalugu.

Ataatsimut isigalugu suli tulleriiaarnerit qaffasinnerpaaffianni quliusunut ungasippoq, ilaatigut Lego, Novo, A. P. Møller aamma Danfoss qaffasinnerpaallutik, kisiannili qaffasinnerpaaffimmut pinissaq immini anguniagaanngilaq. Royal Greenlandip nammineq suliffeqarfiup niuernerup tungaatigut ingerlanneqarnerata pitsanngorsaaviginissaa, pitsaasumik aningaasarsiornissap qulakkeernissaa aammalu periarfissat pissanganartut malersornissaat anguaniagarivai. Suliat tamakku avataanit maluginiarneqaraangata soorunami tuikkut nersualaarinnissutitut tiguneqartarput.

Allattoq: Ulla Skibsted

Asseq

 
 

Royal Greenland aperiguk

i
Write the text from the image