KNAPK Royal Greenlandilu ataatsimoorlutik aaqqissuussaminnik aappassaa isumasioqatigiisitsipput. Naapeqatigiinnermi nungusaataanngitsumik pitsaasumillu aalisarneq qitiutinneqarput, aammalu naapeqatigiinneq aalisartut peqatigiiffiisa, biologit, allaffissornikkut ingerlatsisut kiisalu tunisassiorfiit akornanni paaseqatigiittoqarnissaanik periarfissiinermik oqaloqatigiinnissamillu siunertaqarpoq.

Ulloq pissangarnartumik ingerlanneqarpoq, matumani Pinngortitaleriffimmiit, Aalisarnermut, Piniarnermut Nunalerinermullu Naalakkersuisoqarfimmiit kiisalu aaqqissuisuniit oqalugiartoqarluni. Ilaatigut Uummannap eqqaani qaleraleqassutsip ineriartornera, sinerissap qanittuani aalisarnerup pisortaqarfitsigut ingerlanneqarnera aamma MSC-ip malittarisassai saqqummiunneqarput.

Ulloqeqqasioreernerup kingorna sumiiffiit aalisarfiusartut nunap assinganut nalunaarsorneqarput aalisartullu misilittakkaminnik isummersoqatigiillutik. Tunisassiassaq pisisartunut Europamiuusinnaasunut Asiamiuusinnaasunullu apuunnissaata tungaanut pitsaasuutittuarumallugu qajassuartumik tunisassiarineqarnissaa pingaaruteqarluinnartuusoq tunisassiorfinnit erseqqissaatigineqarpoq. Qajassuartumimmi tunisassiarineqanngippat akia appassaaq iluanaaruteqarfiunngitsumillu tunisassiarineqassalluni.

Ualeq workshopimik naggaserneqarpoq, matumani peqataasut eqimattanut agguataarlugit aalisagaqassutsip ineriartornera, ukiuni marlunni- tallimani tulliuttuni aalisarneq, piujuartitsineq, pitsaassuseq aaamma inuttalersuineq pillugit isummersoqatigiisinneqarput periusissanillu pitsanngoriartitsisinnaasunik saqqummiillutik.

Isummat ilai makkuupput:

  • Aalisagaqassuseq aalaakkaavoq aalisakkallu ikiliartornerannut takussutissaqarani.
  • Pisassiissutigineqartartut annertusineqartariaqarput illullu qerititsivittut atorneqartut allineqarlutik
  • Pisassiissutigineqartartut naleqquttumik agguaanneqartarnissaat pillugu umiatsiaararsorlutik aalisartartut suleqataasariaqarput
  • Umiatsiaararsorlutik aalisartartut immikkut pisassinneqartariaqanngillat, matumani aalisartut inuusukaat aalisarnermut akuuniarnerannut ajornarnerulersitsisinnaammat
  • Piujuartitsineq ingasaassilluni paasineqarsorineqartariaqanngilaq, matumani pinngortitap nammineerluni piujuartitsineq isumagisarmagu
  • Pitsaanerusumik tunisassiassanik passussineq angallatini anginerusuni qularnaanneruvoq
  • Tunisassiorfik aasaq naallugu ammatinneqartassaaq
  • Tunisassiorfik aasami inuttalersoruminaappoq
  • Uummannap kangerluani qalerallit suffinerisa nalaani qalerallit suallit suannillu sinneqartut aalisartunit naammattoorneqakkajuttarput

Uummannami Piniarnermut Aalisarnermullu ilinniarfimmit peqataasoqarluarnera peqqutaalluni eqimattat maanna aalisartooreersunit siunissamilu aalisartunngortussanit peqataaffigineqartut pimoorusseqalutik isumasioqatigiipput.

Uummannami nunaqarfittaanilu aalisartut aalisartunngorumaartussallu. 

Allattoq assiliisorlu: Lisbeth Due Shcönemann-Paul 

Asseq

 
 

Royal Greenland aperiguk

i
Write the text from the image