Niuernermi periarfissanik susassaqarfiup siunertaraa niuernermi ingerlatsinermi Kalaallit Nunaanni aalisakkanik pisuussutinik, aalisariaatsinik tukertitsinernillu atorluagassanik qulaajaanissaq.

Susassaqarfik nutaaq Kalaallit Nunaanni immamit pisuussutinut niuerutaanngitsunut tunngasunik kiisalu aalisakkanut pissuseqatigiiaanut Atlantikup Avannaata imartaaneersunik tukertitsinermut tunngasunik ilisimasanik aamma katersuiffiussaaq.

- Susassaqarfiup nutaap pilersinneqartup iluatsilluartumik ingerlanissaanut iluaqutaasinnaasunik arlalinnik qulakkeerisussanik ilisimasaqareerpugut. Japanimimi atuisartunut qaleralinnik, raajanik saattuanillu tunisassiorneq pikkoriffigalutigu ukiuni arlalinni pitsanngorsaanermik ingerlataqarnitsigut Kangianut tunisassiarineqartartunik pitsanngorsaaneq misilittagaqarfigilluarparput. Misilittakkatta takutilluinnarpaat, Kangiani atuisartunit mamarilluarneqartunik allanik nutaanik tunisassianik ineriartortitsinissamut periarfissaqarluartoq. Eqqusaasinnaapput, siuteruusinnaapput, inalugaliusinnaapput pissuseqatigiiaalluunniit allaasinnaallutik. Minitaqarusunngilagut, misissueqqissaarluareeruttali pissuseqatigiiaat nioqqutigilluarsinnaasorisavut toqqassavagut, suliffeqarfissuarmi tunisassiornermi pisortaq Lars Nielsen oqarpoq.

Royal Greenlandip nassuerutigaa, nutaanik tunisassiassanik toqqaaniaraanni piareersaasiorluarnissaq pisariaqartoq tunisassiarineqartussallu nutaat tunisassiorfinni ullormiit ullormut tunisassiarineqalersinnaanngitsut. Tamatumunnga atatillugu periarfissat pillugit Royal Greenlandip aalisartunik oqaloqateqartarnini annertusarniarpai, suliassanillu pingaarnersiuinissaq siunertaralugu aalajangiinissamut ilisimasanik katersiniarsariniarluni.

Tamakku ilutigalugit niueqateqarsinnaanermut atatillugu Royal Greenlandip Nunanut Avannarlernut attassuteqalernissaq isumaginiarpaa, ilisimasallu kingulliit malinnaaffiginissaat qulakkeerumallugu ilisimatusarnermik ingerlatsisoqarfiit atassuteqarfigineqassaapput.

Nikoline Ziemer susassaqarfimmi nutaami aqutsisutut atorfittaartussaq Royal Greenlandip qullersaqarfiani Nuummiittumi novembarip aallaqqaataani 2013-imi sulilissaaq. Nikoline Ziemer Cand. Scient-itut kiisalu MiniMBA-mik ilinniagaqartoq Pinngortitaleriffimmi Nuummiittumi ukiuni arlalinni siornatigut sulisimavoq.

Royal Greenlanip North Atlantic Championimik taallugu nutaamik iliuuseqarnissamut pilersaarusiorneranut atatillugu qulequttat pingaarnerit ilaattut "Pursue Greenlandic Opportunities" kalaallisut "Kalaallit Nunaanni periarfissat piviusunngortikkit" pilersinneqarpoq, tassanilu susassaqarfik "New Business Development Greenland" immikkoortortat ilaattut inissisimavoq.

Paasissutissanik amerlanerusunik pissarserusukkuit suliffeqarfissuup tunisassiornermi pisortaa Lars Nielsen attaveqarfigisinnaavat, normumut uunga sianerlutit: +299 52 38 66.

Asseq

 
 

Royal Greenland aperiguk

i
Write the text from the image