Royal Greenlandip aasaanerani suliartortitsinera iluatsingaanngilaq atorfinitsitat akornanni inuttut ajornartorsiuteqartoqarmat.

- Suliartortitsinerput nalilersoreerlugu inerniliivugut aasaanerani suliartortitatta affai sinneqalugit inuttut ajornartorsiuteqarnertik pissutiginerullugu suliffimminnik paarsisinnaanngitsut. Sulisorpaaluit suliartunngitsoortarput imaluunniit piffissaq eqqorlugu suliartorsinnaasaratik, suliartortitallu ilarpaalui akissarsereernerup kingorna suliartunngitsoortarlutik, Sulisoqarnermi Pikkorissaasarnermilu Ingerlatsisoq Søren Olsen Damgaard naliliivoq.

Sulisoqarnermi Pikkorissaasarnermilu Ingerlatsisup erseqqissarpaa, aasaanerani suliartortitat Paamiuni, Qasigiannguani aamma Uummanami nunaqarfiinilu suleqatitaaminnit illoqarfeqatitaaminnillu tikilluaqquneqarluarsimasut aammalu tikilluaqqusaalluartutut misigisimasut.

- Ajoraluartumik suliartortitsinitta inernera ilimagisatsinnit ajorneruvoq. Qujanartumilli suliartortitat ilaqarluarput aalajaatsunik nuannaarutigilluakkatsinnillu aammalu sulisoreriikkatsinnut oqilisaassisimasunik, nuannaaruteqarnerpulli suliartortitatsinnik aalajaatsuunngitsuunngitsunik inuttullu ajornartorsiutiminnik sorsugassaqartunik uggorsaateqarnitsinnit ajoraluartumik annikinnerungajassimavoq.

- Sulisoqarnermi immikkoortortaqarfimmi suleqativut illoqarfinnilu pingasuni pineqartuni tunisassiorfinni ingerlatsisut suliartortitat suliffimminnik paarsisinnaanngitsut ajoraluartumik piffissarujussuarmik atuiffigisimavaat. Suliartortitanillu arlalikasinnik piffissap ingerlanerani soraarsitsisariaqarsimanitta takutiinnarpaa ajornartorsiuteqarnerup qanoq ilungersunartiginera, Sulisoqarnermi Pikkorissaasarnermilu Ingerlatsisoq oqarpoq.

Suliartortitsisimanermili suut tamarmik ajortuinnaanngillat. Suliartortitat qulingiluat Royal Greenlandimi sulisimanertik ima nuannarisimatigaat illoqarfinnut suliartorfigisimasaminnut nuuinnissartik qinnutigisimallugu, tassalu tallimat Qasigiannguanut sisamallu Paamiunut. Atorfinikkusullutik nuukkusunnerat neqeroorutitsialaavoq qujarunneqarluartoq, Royal Greenlandillu ukiup naannginnerani piviusunngortinniarlugu sulissutigilereerpaa.

Aasaanerani suliartortitsiniarluni sulisussarsiornermi ussassaarummut 500-t missaat Danmarkimit, Savalimmiunit, Islandimit Kalaallit Nunaannillu qinnuteqarput, 74-illu Kalaallit Nunaanneersuinnaat atorfinitsinneqarput.

- Ukiut siuliini aasaanerani sulisusaaleqisarnerni misilittakkavut pitsaanngitsut aallaavigalugit ukioq manna siusinnerusukkut immikkut illuinnartumik iliuuseqarluta suliartortitassatsinnik sulisusarsiorpugut. Nalilersuinittalu takutippaa aasaanerani suliartortitsisarnerinnakkut ajornartorsiuterput qaangerneqarsinnaanngilluinnartoq. Maannalu ingerlariaqqilluta sulisussaaleqisarnerup kingunerisartagaasa sunniutaanik qanoq annikillisaasinnaanerput paasiniartariaqarparput, Sulisoqarnermi Pikkorissaasarnermilu Ingerlatsisoq Søren Olsen Damgaard inerniliivoq.

Annertunerusumik paasisaqarusuttut Sulisoqarnermi Pikkorissaasarnermilu Ingerlatsisoq Søren Olsen Damgaard mobilnormu + 299 54 75 87-imi attavigisinnaavaat.

Asseq

 
 

Royal Greenland aperiguk

i
Write the text from the image