Isumaqatigiissusiornerit naammassineqarnerat taamatuttaaq ingerlatseqatigiiffiit pisisut pineqartut marluk peqatigalugit Wilhelmshavenimi tuniniarneqartut pillugit inaarutaasumik isumaqatigiissummik atsioqateqarsimanini Royal Greenlandip nalunaarutigisinnaagamiuk tulluusimaarutigaa.

Royal Greenland Seafood GmbH-mi akitiatigut aningaasaatit pisisunit pigineqalissapput. Matumanilu piginnittunngortussat tunisassiorfimmik piginnittunngunnginnerini Cuxhavenimi aamma Tysklandimi suannik tunisassiornerit tunisassiorfinnut allanut nuunneqassapput tunisassiallu nutaat zip-lock/chain-pack-it tunisassiorfiup tunineqarneranut atatillugu isumaqatigiissusiornermi ilanngunneqannginnerat pissutigalugu tunisassiarineqalissallutik.

Wilhelmshavenip aamma Royal Greenlandip Europami tunisassiarisartagai allat pisariaqanngitsumik kipisaqattaartumik tunisassiariinnarneqarnissaat isumannaarusullugu isumaqatigiissusioqatigiittut isumaqatigiissutigaat, Royal Greenlandip Tysklandimi aamma Frankrigmi ingerlatseqatigiiffiit tuniniaanermik ingerlataqartut pigeriigai immikkoortinneqassasut. Taamaattumik Royal Greenlandip aamma tunisassiorfiup Wilhelmshavenimiittup pisisartui tamaasa tuniniaanermi suleqatinit misilittagaqarluartunit massakkorpiaq Royal Greenlandimi Bremenimiittumi aamma Parisimiittumi sulisunit sullinneqaannassapput.

Tunisassiorfik allanik piginnittoqalernera akuersissutinik arlalinnik tunngaveqarpoq, taakkualu kingusinnerpaamik 2013-ip naanerani naamassineqassasut Royal Greenlandimit pisisartuniillu ilimagineqarpoq.

Mikael Thinghuus, Royal Greenlandimi pisortaanerusoq oqarpoq: "Wilhelmshavenimi suliaqarfiutitsinnik piginnittussanik nassaarnerput nuannaarutigisorujussuaarput. Piginnittut nutaat suliffeqarfimmik siuarsaasinnaassapput, Royal Greenlandilu piginnittuuginnaraluarpat siuarsaaneq ingerlanneqarsinnaanavianngikkaluarpoq. Kalaallit Nunaanni Atlantikullu avannarpasissuani suliaqarfigisavut siunissami aallunnerulissavavut".

Suliarfiit tunineqartut Royal Greenlandip maanna suliaqarfigisartagaasa 40 %-it missigaat, Royal Greenlandip kaaviiaartittagaasa 30 %-ii taakkunaneersuupput suliffeqarfissuullu sulisuinit 20 %-init amerlanerusunit suliffigineqarlutik.

Tunisassiorfiutitta tuninera Royal Greenlandip qaffasissumik pitsaassusilinnik aalisakkanik tunisassiortutut tuniniaasutullu ilisimaneqarneranut pingaarutilimmik sunniuteqarluassaaq, matumanilu aalisakkanik Atlantikup avannarpasissuaneersunik tunisassiullammanngornissatsinnut tuniniaasunngornissatsinnullu pilersaaruteqarnitsinnut attuumassuteqarpoq, Thinghuus nangilluni oqarpoq.

Nuuk, 10. september 2013
Mikael Thinghuus


Royal Greenland pillugu
Royal Greenland tunuliaqutani immikkut ittoq aamma aalisakkanik qalerualinnillu Kalaallit Nunaanneersunik aamma nunarsuup sinneraneersunik pitsaanerpaanik tunisassiortarnini tuniniaasarninilu aqqutigalugit atuisup nutaalianik eqqummaarinnittup pisariaqartitai tunniuttarpai. Tunisassiarisartakkavut assigiinngitsut najoqqutaralugit qalerualinnik nioqqutissanillu ineriikkanik niuertarfissuarnut aamma nerisassanik piareersariikkanik sassaalliisartunut neqerooruteqartarpugut. Nunarsuarmi immap nillertup raajaanik qaleralinnillu Kalaallit Nunaanneersunik pisiortorfiunerpaajuvugut taamatuttaaq Europami aalisakkerisuni annersaat qulit akornanniilluta.

Royal Greenland 2011/2012-imi DKK 5 mia.-it kaaviiaartippai akileraarutillu ilanngaatigereerlugit DKK 136 mio.-it iluanaarutigalugit.

Sahara Investment Group Pte. Ltd aamma Meridian Investment Group Pte. Ltd pillugit
Sahara Investment Group Private Limited aamma Meridian Investment Group Pte. Ltd Singaporemi suliffeqarfiupput. Ingerlatseqatigiiffiit ataatsimoorlutik Royal Greenland Seafood GmbH pigilissavaat, matumani Ruslandimiu aningaasaliisartoq aalisakkanik tunisassiornerup silarsuaani - annerusumik saarulliit ilaannik ammassassuarnillu aalisarnermik tunisassiornermillu ukiuni 18-init amerlanerusunit misilittagaqartoq - akitiaatinik amerlanerussuteqarluni piginnittooqataassalluni.

Asseq

 
 

Royal Greenland aperiguk

i
Write the text from the image