Nakkutilliisoqarfimmik pilersitsisoqarnera Kalaallit Nunaanni nakkutilliisoqarfimmik atuisartut atuinerisigut aningaasalersorneqassaaq, tamatumani Royal Greenland aamma atuinermigut aningaasalersueqataassalluni.

Tassa imaappoq, nakkutilliisoqarfiup pilersinneqarneranut atatillugu aningaasartuutaasut tamaasa ukiut pingasut affarlu missaat qaangiuppata akilerneqarnissaata tungaanut Royal Greenland containerimik 40 fodsimik ataatsimik aalisakkanik tunisassianik imalimmik tamatigut nassiussigaangami nakkutilliisoqarfimmik atuinermut aningaasaleeqataasassaaq.

- Iluaqutit ilaattut taassavara Royal Greenlandip Danmarkimi assartugalerinermi immikkoortortaqarfiani akuersissutit immikkut ittut suliarineqartariaarummata, aammalu raajanik aalisakkanillu tunisassiai EU-mut tikiunneqaraangata uumasut nakorsaanit misissorneqartariaarummata. Tamannalu Royal Greenlandimut iluaqutaavoq, Ane Lynge, Kalaallit Nunaanni Royal Greenlandimi assartugalerinermi aqutsisoq oqarpoq.

- Tunisassianik Kalaallit Nunaannit Aalborgimut nassiussat tikinnerani tigusisinnaaneq sukkanerulertussaassaaq, taamaattumilu aalisakkanik tunisassianik tunisisarneq sukkanerulersinnaanngussalluni, Ane Lynge naggasiivoq.

Danmarkimi inuussutissalerinermut ministerip Dan Jørgensenip, Socialdemokraterne, Royal Greenlandimi pisortaqatigiit 13. august 2014-imi ataatsimeeqatigai.

EU-p Nuummi killeqarfimmik nakkutilliisoqarfittaavaa, Border Inspection Post – BIP, Nuup umiarsualiviani Royal Arctic Linep illuutaasa eqqaaniittoq, qallunaat Inuussutissalerinermut ministerianit aamma Aalisarnermut, Piniarnermut Nunalerinermullu Naalakkersuisumit Finn Karlsenimit marlunngormat 12. august 2014-imi ammarneqarpoq.

Aalisakkanik tunisassianut tunngatillugu EU-p nunanik niueqateqartarnermini Kalaallit Nunaannik niueqateqartalernerata nalliuttorsiutigineqarnera iluatsillugu EU-p Kalaallit Nunaanni killeqarfimmik nakkutilliisoqarfia pisortatigoortumik atoqqaarfissiorneqarpoq.

Allattoq: Bula Larsen

Asseq

 
 

Royal Greenland aperiguk

i
Write the text from the image