Ove Krusep Ilulissat illoqarfiata killingani qimusserluni tikeqqammerluni 2. april 2014, Royal Greenlandip tunisinermut aqutsisua qaleralittaminik 148 kiilunik aallertoq, utaqqivaa.

- Naammattunik qaleraleqaraluarpoq, ullullu allortarlugit qimusserlunga kangianukartarpunga. Kingusinaarlunga februarimi aallartippunga, qimmissannik naammattunik katerseqqaarama. Upernarnissaata sikullu ajortinnissaata tungaanut aalisassaanga. Maanna siku ajunngilaq Nunatarsuup ikerata nalaani.  Qimussit pingasuulluta sikumi tuperluta unnuivugut. Allat marluk aatsaat aallarput,  Ove Kruse oqaluttuarpoq.

Jens Olsvig, Royal Greenlandimi tunisinermi aqutsisoq, Ilulissat: - Aalisartut maanna qimussimut ataatsimut qalerallit 150-250 kiilut missaat tikiuttarpaat, sapaatillu akunnerani ataatsimi qimussit marluk-pingasuinnaat tunisiffigisarpaatigut. Allat aamma ikittut allanut tunisiffiusartunut tunisisarput.

- 1980-ikkunnut naleqqiullugit qimussit aalisariartartut ikeqaat. Taamani qimussit 100-t missaat ullormut qaleralinnik usillutik tikerartarput! Novemberimi aallartikkaangamik majimi taamaatittarlutik. Taamani aamma issinneruvoq, Nunatarsuup ikeraniit silammut sikoqarnerulluni. Silap pissusaata allanngornerisa kinguneri maanna malugaagut. Aamma taamani aalisartorpassuit maanna utoqqalipput. 

- Inuusuttut qimussillit ullumikkut takornariat qimussiunnerusarpaat, takornariaarutileraangallu aatsaat aalisalersarput, kisianni angallatinik aalisarnerullutik, Jens Olsvig naggasiivoq.

Allattoq: bula@royalgreenland.com

Asseq

 
 

Royal Greenland aperiguk

i
Write the text from the image