Sisimiut Fiship Sarfannguani, Itillimi Sisimiunilu tunisassiorfiinik tigusiniarneq kiisami inissippoq, Inuussutissalerinermik aqutsisoqarfimmit tuniniaasinnaanermut akuersissutinik allannguinerit aammalu pisarialinnik suliassat maanna inissinneqaqqammerput.

Sisimiut Fiship Sarfannguani Sisimiunilu tunisassiorfigisimasai ataasinngornermi januaarip 27-ani tulaassuivigineqarsinnaalissapput, Itillimilu tunisassiorfik februaarip 3-ani ammassalluni, taamalu sumiiffinni pingasuni taakkunani saarullinnik tulaassuisoqarsinnaalissaaq. Itillimi tunisassiorfiup ammarnissaa kingusinnerulaartukkut pissaaq, tunisassiat 10-12 tonsit umiarsuarmut usilersuutigineqaqqaartussammata. Umiarsuaaraq nunaqarfinnut assartuut Itillimut usilersoriartorluni tallimanngorpat tikissangatinneqarpoq, pilersaarutillu malinneqassappata tunisineq ataasinngornermi februaarip 3-ani aallartinneqarsinnaassaaq.

Sisimiuni aalisartut saarullinnik annertunerusunik Sisimiut tunisassiorfianut tulaassuisinnaanissaq ukiuni arlaqalersuni kissaatigisimavaat. Kissaataasa ilaat tunisassiorfinnik pingasunik pineqartunik ammaanikkut maanna piviusunngorsinnaanngorput, upernaarulu Sisimiuni qerititsivimmik ikkussuisoqassamaarpoq, taamaasillutillu aalisartut aalisakkanik allanik tulaassuisinnaalissapput.

Qerititsivimmik ikkussuisoqarnera ilutigalugu assagiarsunnik tunisassiorfik nutaanngilisimaqisoq pisassarititanullu angivallaarujussualersimasoq isaterneqassaaq, taannaavorlu assagiarsunniat Maniitsumut tulaassuisalernissaannut peqqutaasoq.

- Qerititsivimmik ikkussuinissatsinnut atatillugu aalajangerparput qerititsivimmik nutaaliaasumik inissaqartitsissagutta assagiarsunnut tunisassiorfik nutaanngilillunilu nungullarsimaqisoq isaterneqartariaqartoq. Maannamut assagiarsuleriffiusimasumi ini nutarterneqartussanngorpoq ilutigisaanillu naqqit nutaarluinnarnik taarsersorneqassallutik, imermik ataanut kuuttoqartarnera pissutigalugu. Naqqit nutarterneqareerpata saarullinnut aalisakkanullu allanut qerititsivissat ikkussorneqassapput. Inini taakkunani assagiarsunnut tunisassiorfeqaleqqinnissaa suli aalajangiivigineqanngilaq, kingusinnerusukkulli inissinneqarsinnaanissaa aaqqiivigissavarput, Sten Sørensen aqutsinermi ingerlatsiq oqarpoq nangilluni:

- Ilisimaaraarput assagiarsunnianut Sisimiuneersunut Maniitsumut tunisiartortarnissaq pisariullunilu akisunerussasoq, aalisartunilli isumaqatigiissusiorsinnaanitsinnik misissuivugut, taamaasillutik pisaminnik Maniitsumut tunisiartortarneranni aningaasartuuteqarnerussutaannik taarsiivigisinnaaniassagatsigit, Sten Sørensen oqarpoq.

Asseq

 
 

Royal Greenland aperiguk

i
Write the text from the image