Ilinniartut 14-it 19-iniit 40-t tungaannut ukiullit Kangerlussuarmi naapisimaarnerminni paasissutissarpassuarnik iluaqutissarsipput, ilinniartullu naapisimaarneq iluatsilluartutut nalilerpaat.

- Ilinniartut naapisimaarnerat ilinniartunut arlalinnut eqiiallaataavoq. Nuanneqaaq takullugu ilaasa paasimmassuk pitsaanerusumik inooriaaseqarniarunik ileqqupalaaminnik allannguiniarlutik namminneq iliuuseqartariaqarlutik. Ilinniartup ataatsip paasivaa ileqqupalaat perorsagaasimanermini pigiliussimasani iliuuseqarfigisariaqarlugit, allap inortuisarnerminik ileqqupalaani iliuuseqarfiginiarpaa allallu internetsimik atuisarnerujussuani nassuerutigaa, Esther Arens Sulisoqarnermi siunnersorti oqarpoq.

Ilinniartut naapisimaaqatigiinneranni siunertat ilagaat ilinniartut imminnut paasisimasaqarnerulernissaat, ilaatigullu ileqqupalaanik ileqqorissaarutinillu ilisarsisinnaalertortarniassammata iliuuseqarfigalugillu. Ilinniartut iliuusissaminnik ilitsersorneqarput ataasiakkaarlutillu ileqqupalaanik taamaatitsiniarlutik ileqqorissaarutinillu pigiliussinissaat siunertaralugu siunnerfilersuutissaminnik pilersaarusiortinneqarput.

Eqiiallaataasoq ataasiinnaanngilaq, tassami peqataasut paasivaat Royal Greenlandip nunarsuaq tamakkerlugu suliffeqarfiunera ilisimassallugu qanoq pingaaruteqartigisoq. Pingaartumik peqataasut suliffeqarfiup pilersaarusiatut iliuuseriniagaanik paasisimasaqalernertik iluareqaat.

Ilinniartut ilinniartoqatiminnik naapitsinertik aamma iluarisimaqaat. Ataatsimoorlutillu ataatsimoorussatut pingaartitanik eqqartueqatigiissinnaanerup pingaaruteqassusaa oqallisigaat.

Ulluni sisamani sammisat assigiinngiiaartut timersornertalerlugit ingerlanneqartut ima ingerlalluarsimatigaat allaat ilinniartut ullunik sivikinaarisimallutik.

Royal Greenlandimi ilinniartut naapisimaaqatigiittarnerat ukiut tamaasa pisassaaq.

Allattoq: Káte Hansen, kaha@royalgreenland.com

Assit: RG

Asseq

 
 

Royal Greenland aperiguk

i
Write the text from the image