Nipisattat Kalaallit Nunaata imartaaneersut MSC-imik ilisarnaaqquserneqartalernissaannut suliamik ingerlatsisoqaleruttorpoq. Suliaq qaammatit 13-it missaanni sivisussusilimmik ingerlanneqassangatinneqarpoq, suliarlu pilersaarutit malillugit ingerlanneqassappat nipisattat

1. marts 2015-imi ilisarnaaqquserneqartalissapput.

Sustainable Fisheries Greenland Kalaallit Nunaanni aalisartut nipisanniarnermut allagartallit imaluunniit inuussutissarsiutigalugu piniarnermut allagartallit tamaasa sinnerlugit nipisattat ilisarnaaquserneqartalernissaannut qinnuteqartuuvoq.

Royal Greenlandip CSR-imi akisussaasua Lisbeth Due Schønemann-Paul, suliffeqarfik sinnerlugu Sustainable Fisheries Greenlandimi sinniisuusoq oqarpoq:

- Royal Greenlandip nipisannik tunisassianik pisisartuisa MSC-imik ilisarnaaqqutillit pisiarerusuttarmatigit nipisat ilisarnaaqquserneqartalernissaat Royal Greenlandip angorusuttupilussuuaa. Frankrig, Sverige aamma Tyskland MSC-imik ilisarnaaqqutilinnik piserusuttuusarput.

- Aammattaaq nipisat nunat arlallit imartaaneersut uumasut nungoratarsinnaasut allattorsimaffiannnut WWF-imit ilanngunneqarniikuupput, nipisannullu Kalaallit Nunaata imartaaneersunut tunngatillugu naapertuilluarnerunngilaq. Nipisat Kalaallit Nunaata imartaaneersut MSC-imik ilisarnaaqquserneqartalerpata uumasut nungoratarsinnaasut allattorsimaffianni allassimajunnaarlutik uumasut piujuartitat allattorsimaffiannut ilanngunneqarsinnaanngussapput, taamaasilluta nipisat nungusaataanngitsumik aalisarneqartarnerat nunarsuarmioqatitsinnut uppernarsarsinnaanngussavarput.

Ilisarnaaqquserneqartalernissaannut suliamut atatillugu nunarsuarmi nalilersuisartuni siuttut ilaat DNV GL-ip - siornatigut Det Norske Veritasimik ateqartoq maannalu Germanischer Lloydilu kattussimasut – kattuffinnik inunnillu ataasiakkaanik nipisanniarnermik aallutaqartunik oqaloqateqarusuppoq. Nipisanniarnermik aallutaqartut taamaasillutik suliap ingerlanneqarnerani paasissutissanik tunniussinissaminnut, suliamik ingerlatsisunik naapitsinissamminnut imaluunniit nutaarsiassanik kingullernik paasissutissiivigineqartarnissaminnut periarfissaqalissapput. Nipisanniarnermik aallutaqartut uunga allassinnaapput: guro.meldre.pedersen@dnvgl.com

Paasissutissat nipisattat ilisarnaaqquserneqartalerneqarnissaannut suliamut tunngasut nittartakkami uani alakkarneqarsinnaapput:

http://www.msc.org/track-a-fishery/fisheries-in-the-program/in-assessment/north-west-atlantic/greenland-lumpfish.

Marine Stewardship Council (MSC) ingerlatsiviuvoq sumulluunniit attuumassuteqanngitsoq iluanaarniuteqanngitsorlu. Ingerlatsiviullu ilisarnaatini MSC aamma aalisarnernik akuersissutigisartakkani sakkugalugit nungusaataanngitsumik aalisarnernik akuerinninnikkut nersorinninnikkullu nunarsuarmi immat aalaakkaasuunissaannut suleqataanissi, inuit aalisakkanik tunisassianik pisisartut nungusaataanngitsumik aalisarnermi pisanik tunisassianik pisisalernissaannut sunniuteqaqataanissi aammalu niuerfiit aalisakkanik tunisassianik nungusaataanngitsumik aalisarnermi pisanik niueruteqartalernissaat anguniarlugu suleqatinik suleqateqarnissi siunertaralugu sulianik ingerlatsivoq.

Allattoq: Káte Hansen, kaha@royalgreenland.com

Assiliisoq: John David Eriksen

Asseq

 
 

Royal Greenland aperiguk

i
Write the text from the image