Taamaammat Royal Greenlandip aningaasaliiffigisatut aningaasaliiffigisassatullu pilersaarutini pillugit Inatsisartut Aalisarnermut, Piniarnermut Nunalerinermullu Ataatsimiititaliamut aammalu Aalisarnermut, Piniarnermut Nunalerinermullu Naalakkersuisumut siusinnerusukkut ilisimatitsissutigai, taamaasillutik aalisarnermik inuussutissarsiuteqarnikkut tunngavissatut naalakkersuinikkut pingaarnersiuinissami ilaasinnaaniassammata.

Naatsumik taakkartuilluni suliffeqarfik tunisassiorfinni ataavartumik tunisassiorsinnaanermik qulakkeerinermigut suliffissanik amerlisaaniarpoq taamalu nammineerluni aningaasarsiornermik ineriartortitsinissamik periarfissiisinnaasumik tunngavissiilluni.

Royal Greenland Narsami, Paamiuni, Qeqertarsuatsiaani, Nuummi, Maniitsumi aammalu Sisimiuni tunisassiorfinni pingaartumik saarullinnik tulaassugassanik tunisassiornermillu qulakkeerinninniarluni ukiuni kingulliunerusuni millionerpaalunnik aningasaliissuteqarsimavoq.

Ajuusaarnaraluartumilli sumiiffinni marlunni tulassuinerit ukioq manna pakatsinarsimapput. Narsami 100 tonsinik tulaassuisoqarnissaanik naatsorsuuteqarfigisimasatsinni maannamut 1700 kg tulaanneqarsimapput. Paamiuni 600 tonsinik tulaassuisoqarnissaanik naatsorsuuteqarfigisimasatsinni 125 tonsit tulaanneqarsimapput.

Akerlianik Royal Greenlandip avannaani tunisassiorfiini pisinnaasat qaleralittassallu oqimaaqatigiissumik ingerlapput. Tamannalu Qasigiannguani tunisassiorfimmi qaleralinnik tunisassiassanik piorsaanermik periarfissiisimavoq, ineriartornerlu tamanna pitsaasoq aamma suliffeqarfiup tunisassiorfiinut allanut siaruaanniarneqarpoq.

- Taamaammat suliffeqarfik najukkani akerleriinnik ajornartorsiuteqarpoq. Avannaani tulaassukkat imaaginnavipput ulapaarfiulli nalaani sulisussanik amigaateqartoqartarpoq, kujataanilu tunisassiorfinni pisinnaasat annertusaavigaagut aalisakkanilli tunisassiassatsinnik amigaateqarluta. Aalisartoqarnermi aaqqissuussaaneq pitsaaneq aalisariutinik nutaarsaanissamut periarfissaqartitsilissaaq, taamalu ukioq kaajallallugu aalisartoqarsinnaalersinnaassaaq tunisassiorfimmi sulisunut aalisartunullu iluaqutaasumik, pisortaq Jens K. Lyberth oqarpoq.

Royal Greenlandip anguniagaqarluni pilersaarusiaa The North Atlantic Champion naapertorlugu pingaarnertut anguniagaavoq Atlantikup Avannaani susassaqarfinni piujuaannartitsilluni inerisaajuarnissaq, ilaatigut Kalaallit Nunaanni tunisassiorfinni. Tamannalu aatsaat Royal Greenlandip aningaasarsiorluarneragut anguneqarsinnaavoq.

Asseq

 
 

Royal Greenland aperiguk

i
Write the text from the image