Ulluni arlalialunni sulinnginneq, suliffeqarfik pillugu paasissutissarpassuarnik tuniorarneqarneq, inuttut imminut paasinninneq pillugu saqqummiineq oqaloqatigiinnerlu aammalu ullut tamakkiallugit timersorneq. Tamakkuupput Royal Greenlandimi ilinniartut 14-it Kangerlussuarmi juulip 7-aniit 10-ata tungaanut naapisimaalerunik sammisassaat.

- Ilinniartut 14-it illoqarfinnit assigiinngitsuneersuusut Royal Greenlandimi sulisutut allatuulli imminnut tikillutik naapeqatigiittarnerattuulli periarfissinneqarniarput taamalu suliffeqarfimmi ilinniartuunertik pillugu paasisaqassallutik, Sulisoqarnermi siunnersorti Esther Arens nassuiaavoq.

Ilinniartut suliffeqarfik anguniagaalu pillugit aammalu suliffeqarfimmi ilinniartutut inissisimanertik paasisaqarfiginerussavaat, assigiinngitsullu eqqartorneqassapput: "Ileqqut pitsaasut arfineq marluk", Ileqqutoqqanik allannguiniarneq, periutsit pitsaasut ajortullu, suliffeqarfik pillugu ilisarititsineq aammalu siunissami suliffeqarfimmi piginnaanngorsarneq.

- Assigiinngitsunik sammisaqartitsinissami siunertaavoq ilinniartut inuttut imminnut paasisaqarnerulernissaat aammalu pissusilersuutit pillugit ilinniarnissaat, pitsaasunik pitsaavallaanngitsunillu. Pissusilersuutit ajortut – soorlu suliffimmik paarsinnginneq imaluunniit kammalaatigiinnerit pitsaanngitsut - qimanniarnissaannut iliuuserisinnaasaminnik ilinniartinneqassapput. Ilinniartut pitsaasunik ileqqulersortalernissamut aqqutissiuunneqassapput, inuttut ataasiakkaatut suliffeqarfimmilu suleqataasutut periarfissatik piginnaasatillu pitsanngorsarsinnaaniassammatigit, Esther Arens oqarpoq.

Ulluinnarni niaqorsuutit timersuutinik akunnilerneqartassapput, soorlu sumiissusersiorluni arpanneq, timersorneq allallu. Ilinniartuttaaq Royal Greenlandi ilinniartuuffittut nammineq assilisat oqaaseqatigiiliallu atorlugit allagartarsualiarissavaat ilinniartunut nittarsaassinermi atortagassamik.

Allattoq: Káte Hansen

Asseq: John David Eriksen

Asseq

 
 

Royal Greenland aperiguk

i
Write the text from the image