Malou Skifte Royal Greenlandimit taperneqarluni USA-mut aallarsinnaasimanerminut qujassuteqarpoq. Maloup USA-mi ilaqutarsiai nuannerluinnartut tassaapput anaanaq, ataataq meeqqallu tallimat. Maloullu misigisimasai tigulaariffigissavagut:

- Tikinneq nuannerluinnarpoq! Assut nuanneqaaq takoqqaarlugit! Uattulli nuannaartigalutillu pissangapput. Sapaatip akunneri siulliit nuanneqaat, seqineq alianaatsitseqaluni tarrikkiartortarami, ullullu 30 graderinik kiattarput assut silaannaq assut isugutattarluni. Isugutanneq sungiunniarsareqqaarpara. Medoramukarluta tammaarsimaarpugut campererluta angajoqqaarsiama ikinngutai ilagalugit, taakkulu uannut pitsaasaaqaat. Aammattaaq Medora musical ornipparput, countrymusik tusarnaariarlugu - nipilersortullu takullugit nuanneqaaq.

- September. Ikinngutitaarpunga volleyballertalerlungalu. Atuarfimmi Homecoming allanarpoq, sapaatillu akunnera tamaat atisalersoqattaartussaavugut. Ataasinngornermi sinngusinik, marlunngornermi 80’sikkornisut, pingasunngornermi sapiitsuliortartutut/tusaamasatut, sisamanngorneq class color, tallimanngornermi nersussuit black and white Holstein qalipaataannik qalipaaserluta atisalersorpugut.

- Oktober. USA-mi halloween pissanganarpoq. Sakkutuutut atisalersorpunga ataatarsiannik atukkannik. Trick and treat (atisalersorluni inunnut pulaaqattaarneq mamakujuttunnanniarluni) misilippara. Aamma nunanit allanit AFS-erlutik ukiiartornikut ilagalugit Bismarckimi ataatsimiigiarpunga. North Dakotamut katilluta 17-iulluta atuariartorluta ukiiartorsimavugut.

- November. Wisconsinimukarpugut angajoqqaarsiama angajoqqaavi Thanksgivingeriaqatigalugit. Assut nerisassat mamarput, akornanniipporlu kalkunerujussuaq.

- December. Hawaiiliarpugut, ullut qulit seqinnisaarluta sisssamiillutalu. Aamma qatanngutisiara angut Honolulu Universitetianit allagartartaarnerani ornipparput. Angerlarsilaanngitsuunngilanga, juullilermat ukiutoqangajalerlunilu. 24. december angajoqqaakka juullisiortut skypeqatigaakka. Kalaallit Nunanni ilaquttakka qimallugit juullisiorpunga siullerpaamik. Ilaquttannit tunissutisiassakka ilaqutarsiannit siulliunerulaarlunga ammaatiterpakka, tamannalu nuannaarutigeqaara tuppallersaatigigakkit. Qujanartumik kalaalerpaluttunik tussiutinik cd-mit tusarnaarpugut mamartunillu nerilluta, uanga ilaqutarsiakkalu nuannerluinnartut Youngikkut. Misigisaq puigunaappoq.

- Atuarfimmi ukiutoqarsiorpugut, assigiinngitsunillu sammisaqarluta soorlu Wii aamma qitik. Unnuap qeqqanut ataatsimoorluta immitsinnut oqarfigaagut ’HAPPY NEW YEAR’. 2014! Januar, qaammat ukiunik 17-iliiffiga. Nalliuttorsiualaartitsivunga ’17th birthday party’ basketballeqatigisartakkannut. Nuanneqaaq, pitsaasunillu tunisippunga.

- Marts. Track arpanneq aallartippara (banemi arpanneq) timersornerlu taanna uannut nuannernersaavoq. Trackimik sungiusartarpunga ullut tamaasa atuareeraangama. Assut pikkunarpoq misilillugu!

- April. Ullut arfinillit nunamut allamut atuariartoqatikka allat peqatigalugit angalaarpugut. Ilaatigut misigaagut: Los Angeles Hollywood Sightseeing Tour aamma Hollywood Boulevard. Assut pikkusuppugut! Universal studios takornariarparput kingornalu Hard Rock Café Hollywoodimiilluta. Aamma Disneyland Californiamiippugut, tassani Adventure Parkimiilluta. Misilitassat tamangajaasa misilippakka!

- Maj. Prom (atuarfimmi qitik). Nujaleritippunga pinnersartillungalu. Qaaqqusisuma Allenip aavaanga, atuarfiliarpugut assiliseqattaarlutalu. Inuusuttorpassuit pinnersut kusanartunik kjolillit aamma smokingillit. Qitinnerput nuanneqaaq!

- Qaammat ingerlalaareersoq atuaqatikka Kalaallit Nunaat pillugu saqqummiiffigivakka. Atuaqatikka pikkusoqaat, kingornalu Kalaallit Nunaat pillugu aperisaqattaarpaannga. Kalaallit Nunaannut angerlalertinnanga ullorlu atuarfissaq kingulleq qanillilermat sapaatip akunnerata naanerani South Dakotaliarpugut. Assut alianaappoq!

- 21. maj kingullermik atuarpunga. 23. maj anaanaga Kalaallit Nunaannit tikippoq, aallunga. Taavalu ulloq takkuppoq angajoqqaarsiakka asanartut inuulluaqqusussanngorakkit. Misigissutsikka allanngoraqaat, qullilisaqattaarpungalu. Nuummut uteqqinnissara inuillu takoqqinnissaat pissangageqaakka. Kisianni aamma inuppassuit ukiup ingerlanerani inuuninnut attuumassuteqalersimasut inuulluaqqoqqammerpakka.

- Unali qularutissaanngilaq, ukioq inuuninni puigugassarinngisannik misigisaqarfigisimavara, assullu eqqumiippoq ukioq naammat. Amerikamiut inooriaasiat kulturiallu misigisaqarfigaakka, tamannalu immini pikkunaqaaq. Inuuninni misigisaq uummatinnut toqqorpara.

Malou anaananilu angerlariartuutaa New York aqqusaarpaat. Augustimilu 1. GU-mi atualissaaq. Malou Skifte unamminartunik nutaanik misigisaqarnissaminut qilanaarpoq.

Allattoq: bula@royalgreenland.com

Asseq

 
 

Royal Greenland aperiguk

i
Write the text from the image