Suliffeqarfik Royal Greenland taama angitigisoq taamalu amerlatigisunik immikkoortortaqartoq suliassaqarfiisalu suleqatigiinnerisa pingaaruteqassusaat ilisimarpiarsimanngilara. Qaammatini arfineq-marlunni siullerni immikkoortortani assigiinngitsuni pingasuni – Danmarkimi, Nunatsinni Polenimilu – suliniutit arlallit ingerlappakka, suliniutillu ingerlannerini suliffeqarfiup aaqqissuussaanerata isikkua aatsaat iluamik paasiartorlugu.

Kisitsisit allaavii

Suliatigut naatsorsuusiorneq siornatigut taamaallat ingerlattarpara, aamma ajunngilaq, naatsorsuusiorninnili kisitsisit suminngaanniit aallaaveqarnersut ilisimaneq ajorpara. Immikkoortortani assigiinngitsuni sulininni kisitsisit suminngaanniit aallaaveqarnersut paasivara, allatorluinnarlu eqqarsartaaseqalerlungalu nutaanik isumassarsiortalerpunga. Pissanganaqaaq.

Aalajangersimasumik traineetut atorfeqanngilanga, traineetulli sulereeruma aalajangersimasumik atorfininnissara kissaatigeqigakku sapinngisara tamaat suliatigut angusaqarniartuaannarpunga. Traineetullu atorfeqarluni sulineq pissanganarlunilu piumassuseqarluarnarpoq.

Tunniusimaneq annertooq

Sulisut tunniusimalluarnerat assut tupaallaatigaara – suleqatikka tunniusimalluarlutik suliaminnik ingerlatsisut takullugit nuanneqaaq, sulilu annerusumik piumassuseqarlualersitsilluni.

Traineetut atorfeqarluni sulineq suliniutinik ingerlataqarfiulluni immikkoortortani nunanilu assigiinngitsuni ingerlasarpoq. Suliffeqarfiup immikkoortortaani assigiinngitsuni sulinera suliffeqarfiup aaqqissuussaaneranut atatillugu tamakkiisumik isiginnissinnaalersitsivoq. Pitsaaqutiginngitsortaali tassaavoq immikkoortortamut aalajangersimasumut attuumassuteqannginnera, tamannalu pissutigalugu immikkoortortami aalajangersimasumi inissisimaffeqannginnernik ilaqarpoq. Tamannalu eqqumaffigisassaavoq, traineetullu atorfeqaraanni inunnik attavigissaarluarnissap qulakkeersimanissaa pingaaruteqarpoq.

Aalborgimiinnera nuannareqaara – illoqafik nuannerpoq, maanili ukiuusarnera nunatsinnut sanilliullugu allaanerusarmat masakkorpiaq qiimavallaanngilanga! Danmarkilli tamanna ilisarnaaqutigiinnarpaa, sungiunnissaalumi qularinngilluinnarpara :-)

Winniep tunuliaqutaa

Winnie Hammeken International Management Traineetut 1. aggusti 2013-imi atorfinippoq.

Winnie Nuummi 1980-imi inunngorpoq 2009-milu inunngortumik paneqarpoq, ateqarporlu Lily.

Ilinniagaq: Akademimerkonom, naatsorsuuserinerlu sammillugu HD-tut maanna ilinniarpoq

Siornatigut atorfigisimasai: naatsorsuuserisoq, naatsorsuuserinermi nakkutilliisunut ikiorti aamma business controller

Asseq

 
 

Royal Greenland aperiguk

i
Write the text from the image