Ullup sammisaqarfiusup aallartinnerani missiliueriaatsit assiigiinngitsut arlallit DTU Fødevareinstituttet-nimit saqqummiunneqarput, saqqummiunneqartullu tunisassianik ineriartortitsinermut, inuussutissalerinermi isumannaallisaasoqarneranik inuussutissallu ajortunngujaassusaannik uppernarsaanissamut qaqugukkut atorneqarsinnaanerinut assersuutinik imaqarput. Prædiktiv mikrobiologi tassaavoq; qarasaasiap programmii kisitsinermilu najoqqutassat iluaqutigalugit inuussutissat bakteeriaasa amerliartoratarsinnaassusaannik missiliuineq. Pia Nielsen aamma Niels Bøknæs Suliniutinik ingerlatsivimmeersut Royal Greenlandip missiliueriaasiinik saqqummiipput.

Ulloq sammisaqarfik naggaserlugu Royal Greenland, Arla aamma Tulip tunisassianik ineriartortitsinermut kukkusumillu nalileeratartoqarsinnaaneranut atatillugu missiliueriaatsit najoqqutaralugit tunisassianik saqqummiisinneqarput.

Ineriartortitsinermi ingerlatsisoq Jan Soinjoki kapisilinnik nillertumi pujuukkanik, qaleralinnik nillertumi pujuukkanik, raajanik seernartulikkanik aamma nipisap suaanik mamarineqarluartunik sassaalliivoq, taakkualu tunisassiarineqarmata missiliueriaatsit najoqqutaralugit bakteeriaasa amerliartoratarsinnaassusaat ataavartumik missiliorneqarput. Lars Rønde aamma Lars Hansen Pitsaassusilerinermi immikkoortortameersut missiliueriaatsit atorneqarnerisa siammarnissaat pitsanngorsarnissaallu anguniarlugu ullormi sammisaqarfiusumi peqataapputtaaq.

Ulloq sammisaqarfik Royal Greenland aamma DTU Fødevareinstituttet suleqatigiillutik suliniutaannut marluusunut attuumassuteqarpoq, suliniutillu marluusut Grønt- Udviklings og Demostrationsprogrammimit tapiiffigineqarput. Suliniutit marluk pineqartut Royal Greenlandip aalisakkanik tunisassiaanik nutaajusunik – tarajukinnerusunik asiunaveersaaserneqarpianngitsunillu – ineriartortitsinissamut tamatumanilu inuussutissalerinermi tamakkiisumik isumannaallisaanermik attassiinnarnissamut missiliueriaatsinik nutaanik pilersitsinissaq anguniarlugu ingerlanneqarput.

Ulloq sammisaqarfik professor Paw Dalgaardimit DTU Fødevareinstituttet-milu suleqataanit aaqqissuunneqarpoq, ullorlu sammisaqarfiusoq danskinit ilisimatuunit, inuussutissalerisunit inuussutissanillu nakkutilliisartunit 65-it missaanni amerlassuseqartunit peqataaffigineqarpoq.

Allattoq: Ulla Skibsted
Asseq: RG

Asseq

 
 

Royal Greenland aperiguk

i
Write the text from the image