- Ippassaq ataasinngornermi tunisasssiorfiup ammareernerani aalisakkat 2.000 koruuninik naleqartut tunereerpakka, aalisarfippullu minutsit quliinnaat ornittariaammat ulluni tulliuttuni pisaqarluarnissara neriulluarfigaara, Aappilattumi aalisartoq Themo Benjaminsen taama oqarpoq.

Royal Greenlandip Aappilattumi tunisassiorfia tallimanngormat ammarneqarpoq ippassarlu ataasinngornermi saarullinnik qaleralinnillu aalisartunit tunitsivigineqarsinnaalermat tunitsivimmi sulineq aallartilluareerpoq.

- Ataasinngorneq marlunngornerlu aalisartut sisamat saarullinnik qaleralinnillu 500 kilo sinnerlugit tunisereerput, taamaattumik ammarattali ulapillualaaleriivippugut, Aapilattumi tunitsivimmi suleqataasoq Nikolaj Benjaminsen oqarpoq.

Themo Benjaminsenip aalisakkanik tunisisinnaalernertik nuannarutigaa.

- Tunisassiorfiup ammarneqarneratigut siunissami neriuutissaqalerpugut. Maani nunaqarfimmiuusugut aammalumi nunaqarfinni allani najugaqartut suliffissaqarniarnikkut aammalu aningasatigut tunisassiorfiup ammarneqarnera iluaqutigissavarput. Mannamut puisit amiinik tunisisinnaaneq kisiat periarfissarisimavarput, tassalu maanna tunisassiorfiup ammarnera aningaasatigut isertitsilluarfigisinnaalerparput, avatinnguatsinnimi aalisagaqarluarpoq ingammik saarulliinik, Themo Benjaminsen oqarpoq.

Taanna aamma oqarpoq nalunaaquttap akunneri sisimat ingerlanerini 2.000 koruunit nalinginik isertitaqarsimalluni.

- Akunnerit marluk neqitsersuivugut, kingorna minutsit quliinnaat ingerlasarialittut avasitsigisumi ningitsereeratta akunnerit marluk qaangiunnerini saarulliit karsit marluk aammalu qalerallit karsi ataaseq amoorpagut. Maanna aalisaqatigisara ilagalugu taarsinnginnerani ningitsiartoqqinniarpugut tunitsiviup matunnginnerani tunisiniassagatta Themo Benjaminsen oqarpoq.

Themo Benjaminsen oqarpoq silap qanoq innissaa arajutsinaveersaartalerini

- Aqagu niggilaartussaanerarpaat, kisianni sapaatip akunnerata sinnera silagissanerarmassuk aalisarluta silaginnera atorluarniarparput, Themo Benjaminsen naggasiivoq.

Allattoq: Inga Egede

Asseq: Themo Benjaminsen

Asseq

 
 

Royal Greenland aperiguk

i
Write the text from the image